Petropavlda paıdalanýǵa berilmegen jańa úı jańbyrǵa shydas bermeı, shatyrynan sý ketti

PETROPAVL. QazAqparat – Petropavlda turǵyndar áli qonystanyp úlgermegen jańa úıdiń tóbesinen sý aǵyp jatyr. Páterler «2026 jylǵa deıin turǵyn úı-kommýnaldyq ınfraqurylymdy damytý tujyrymdamasy aıasynda» memlekettik baǵdarlama boıynsha nesıe arqyly berilgen, dep habarlaıdy QazAqparat tilshisi.

Petropavldaǵy Gorkıı, 16 mekenjaıyndaǵy bul baspanadan páterlerdi turǵyndar «Otbasy bank» arqyly memlekettik baǵdarlama aıasynda nesıege alǵan. Ázirge kóship kirgen joq. Búgin túnde jaýǵan jańbyrdyń sýy tóbeden aǵyp, joǵary qabattardy sý basty.

«Bul toǵyzynshy qabattaǵy páter, tóbeden taǵy da sý aǵyp jatyr. Edenniń bári sý, qalaı bul jerge materıaldy kirgizemiz eger aıaq alyp júretin jer bolmasa?! Aıtarǵa sózim joq. Shatyrdy aýystyramyz dep ýáde etip edi, eshteńeni de aýystyrǵan joq. Ótinemin, birdeńe isteńizdershi...», - deıdi páter ıesi.

Petropavl qalalyq ákimdigi osy problemaly úıge qatysty túsinik berdi.

«Belgisiz sebeptermen úıdiń tehnıkalyq qabatynda nóser kárizi julynyp, 23 tamyzda jaýyn-shashynnan keıin úıdiń joǵarǵy qabatyndaǵy páterlerdiń tóbesinen sý aqty. Qazirgi ýaqytta merdigerlik uıym - «Alfa Sever» JShS kárizdi qalpyna keltirý boıynsha jumys júrgizdi. Sondaı-aq, kepildik mindettemeler aıasynda kompanııa páterlerdegi tóbeden aqqan sýdyń saldaryn joıady. Merdiger uıymnyń atyna 31 tamyzǵa deıin aqaýlardy joıý týraly habarlama jiberildi», - delingen baspasóz qyzmeti taratqan aqparatta.

Mamandardyń aıtýynsha, baspanaǵa qazirgi ýaqytta elektr energııasyn berý, ınjenerlik-kommýnıkatsııalyq ınfraqurylymdy tartý jumystary júrgizilip jatyr. Jumys aıaqtalǵannan keıin úı qonystandyrylady.

«Bul baspananyń qurylysy 2020 jyly bastaldy. Úıdiń qurylysy byltyr aıaqtalǵanymen, aýmaǵyn abattandyrý jáne ınjenerlik ınfraqurylym salý boıynsha jobany iske asyrý kesheýildedi. Abattandyrý jumystarynyń aıaqtalý merzimi 15 tamyzǵa josparlanǵan. Alaıda, bul jumysqa jaýapty «Enerdjı-Taraz» JShS jumys kestesinen artta qalǵan. Kesteni buzǵany úshin merdigerge aıyppul salynady. Eger jumystar aǵymdaǵy aıdyń sońyna deıin oryndalmasa, atalǵan kompanııa sotqa berilmek», - delingen qalalyq ákimdiktiń baspasóz qyzmeti taratqan aqparatta.