Petropavlda páter tonaǵandar ustaldy
PETROPAVL. QazAqparat - Petropavl qalalyq ІІB krımınaldy polıtsııa qyzmetkerleri páter urylaryn ustady, dep habarlaıdy «QazAqparat» HAA tilshisi SQO ІІD baspasóz qyzmetine silteme jasap.
Petropavlda polıtsııaǵa turǵyndardan páterleriniń tonalǵandyǵy týraly birden birneshe aryz kelip túsken. Belgisiz qylmyskerler úı ıeleri kúndiz jumysqa ketken ýaqytty paıdalanyp, qulyptarǵa kilt sáıkestendirip esikti ashyp kirgen. Zergerlik buıym, aqsha, qurylǵylardy qoldy etken.
Petropavl qalalyq ІІB bastyǵynyń mindetin atqarýshy Asan Meıramovtyń aıtýynsha, urylar kezekti páter tonaý kezinde Sábıt Muqanov kóshesindegi ǵımarattyń beınebaqylaý kamerasyna túsip qalǵan. Keıinnen olar tutqyndaldy. Olar qazirgi tańda 10 páterdi sáıkes keletin kiltpen ashyp, tonaǵandyǵyn moıyndaǵan.
Ustalǵandar 28-30 jas aralyǵyndaǵy Petropavl turǵyndary bolyp shyqty. Buryn olar osyndaı qylmys jasaǵany úshin sottalyp, jazalaryn ótep shyqqan. Ekeýi de nashaqor. 
Qazirgi tańda atalmysh fakti boıynsha QR Qylmystyq kodeksi 188-babynyń 2-tarmaǵy «Urlyq jasaý» boıynsha sotqa deıingi tergeý jumystary júrgizilýde. Osy bapta bes jylǵa deıin bas bostandyqtarynan aıyrý jazasy qarastyrylǵan.
Jyldyń basynan beri SQO aýmaǵynda 216 páterdiń tonalǵandyǵy tirkelgen. Qylmystyń ashylý paıyzy 85%-y quraıdy.
