Petropavlda páter órtendi
PETROPAVL. QazAqparat - Petropavlda páterden órt shyǵyp, jeti adam qutqaryldy. Osy kezde páterdegi órttiń shyǵý sebebi anyqtaldy, dep habarlaıdy «QazAqparat» HAA tilshisi.
Baspasóz qyzmetiniń málimetinshe, tórtinshi qabattaǵy órt balanyń tentektiginen shyqqan. 4 jasar bala sirińkemen oınaǵan. Órt aýmaǵy 10 sharshy metrdi qamtıdy. Shyǵyndar anyqtalyp jatyr.
Buǵan deıin 7 adamnyń qutqarylǵany jaıly habarlanǵan bolatyn.
«Qutqarýshylar basshysy dereý joǵarǵy qabattarǵa gaz tútininen qorǵaý qyzmetin jiberip, úı turǵyndaryn qaýipsiz aımaqqa kóshirý jóninde sheshim qabyldaǵan. 7 jastaǵy qyz ben 4 jasar ul bala jyljymaly avtobaspaldaqtyń kómegimen qutqarylyp, 4 qabattyń balkonynan shyǵaryldy», - dep habarlady baspasóz qyzmeti.
Turǵyn úıden barlyǵy 25 adam qaýipsiz aımaqqa kóshirildi.
