Petropavlda páter kezeginde turǵan jetim bala kezekten zańsyz ysyrylǵan
QR Memlekettik qyzmet isteri agenttigi SQO boıynsha departamentiniń málimetinshe, kóktemde Petropavl ákimdiginiń turǵyn úı-kommýnaldyq sharýashylyǵy, jolaýshylar kóligi jáne avtomobıl joldary bólimine qala turǵyny ótinishpen kelgen. Áıel patronattyq tárbıedegi 2011 jyly týǵan balasyn memlekettik turǵyn úı qorynan páter alý kezegine qoıýda olqylyq baryn aıtqan.
«Áıel patronattyq tárbıedegi balasyn páter kezegine 2018 jyldyń aqpan aıynda qoıǵan. Alaıda kezekte.kz portalynda kezek artqa syrǵyp, kezekke turý ýaqyty 2018 jyldyń qyrkúıegi bolyp ketken. Turǵyn kezektegi oryndy qalypqa keltirýin surap turǵyn úı-kommýnaldyq sharýashylyǵy, jolaýshylar kóligi jáne avtomobıl joldary bólimine habarlasqan, alaıda olar qatelikti ózdiginen túzetýge asyqpaǵan.
Sol sebepti petropavldyq departamentke shaǵymdanyp, shara qoldanýdy surady», - deıdi QR Memlekettik qyzmet isteri agenttigi SQO boıynsha departamenti basqarmasynyń bas mamany Darhan Ermekov.
Departament tekseris uıymdastyryp, onyń qorytyndysy boıynsha jetim balanyń quqyǵy qorǵaldy. Páter kezegindegi ornyn qyrkúıekten aqpanǵa aýystyrýdyń nátıjesinde ol 67 orynǵa ózgerdi.
Al jaýapty memlekettik qyzmetshi - Petropavl ákimdiginiń turǵyn úı-kommýnaldyq sharýashylyǵy, jolaýshylar kóligi jáne avtomobıl joldary bóliminiń bas mamany tártiptik jaýapkershilikke tartylyp, sógis aldy.
