Petropavlda páter ıeleri kooperatıvteri qoǵamdyq baqylaýdan ótti
PETROPAVL. QazAqparat –«Páter ıeleri kooperatıvteri jumysynda qoǵamdyq baqylaýdy damytý» jobasy aıasynda Petropavlda volonterler kóp qabatty turǵyn úılerdi basqarýda jıi kezdesetin kemshilikterdi anyqtady, dep habarlaıdy QazAqparat tilshisi.
Petropavlda páter ıeleri kooperatıvterine monıtorıngti Soltústik Qazaqstan oblysy boıynsha «PIK qaýymdastyǵy» zańdy tulǵalar birlestigi uıymdastyrdy. Qoǵamdyq baqylaýdy ótkizbes buryn 10 volonter arnaıy daıyndyqtan ótti. Keıin olar bir aı boıy ózderine bólingen kóp qabatty turǵyn úıde jumys istedi.
Qanatqaqty jobaǵa oblys ortalyǵynyń kóp qabatty 20 turǵyn úıi qatysýǵa nıet bildirdi.
«Qoǵamdyq baqylaý bir aıǵa jalǵasty. Bizdiń volonterler kóp qabatty úılerdiń turǵyndaryn saýalnamadan ótkizip, 300-den astam jaýap aldy. Bul saýalnamalarda turǵyndar PIK-tiń jumysyna qanshalyqty kóńilderi tolady. Úıdiń sheshýdi qajet etetin qandaı máseleleri bar degen suraqtarǵa jaýap berdi. PIK-terdiń qujattaryn tekserdi. PIK turǵyndardan jınalǵan qarajatty qanshalyqty durys jaratady, esep berý qujattary bar ma, baspanany kúrdeli jóndeý úshin qosymsha qarajat jınaı ma? Óıtkeni kóp jaǵdaıda turǵyndardyń páter ıeleri kooperatıvteriniń jumysyna kóńilderi tolmaı jatady», - deıdi SQO boıynsha «PIK qaýymdastyǵy» ZTB tóraǵasy Sergeı Hýdıakov.
Jobanyń maqsaty - kópqabatty úılerdi basqaryp otyrǵan kooperatıv tóraǵalaryn nátıjeli jumys isteýge yntalandyrý. Óıtkeni qoǵamdyq baqylaý barysynda olardyń kemshilikteri ǵana emes, jetistikterine de nazar aýdaryldy. PIK-terdiń reıtıngisi jasaldy.
«Qoǵamdyq baqylaýdan keıin PIK jumysynda kezdesetin ortaq kemshilikterdiń tizimi jasaldy. Olar: PIK-terdiń atqaryp jatqan jumystary jaıynda júıeli túrde aıtyp otyrmaýy, kúrdeli jóndeý jumystaryna qor jasamaý, revızııalyq komıssııalardyń áreketsizdigi, boryshkerlermen tıisti deńgeıde jumys júrgizbeý. Turǵyndardan da birqatar usynystar tústi, olardyń ishinde podezd jýý úshin tólemdi bólek jınamaı, ortaq smetaǵa engizý. Balalar alańdaryn abattandyrý, aýlalarda avtomobıl turaqtarynyń máselesin sheshý, turǵyndarmen kóbirek qatynas ornatý jáne taǵy basqalary bar. 20 kóp qabatty turǵyn úıdiń ishinen Internatsıonal kóshesi, 29 úıdiń «MIG SKO» PIK úzdik dep tanyldy», - deıdi Sergeı Hýdıakov.
