Petropavlda «Parasatty júrgizýshi – parasatty jolaýshy» aktsııasy bastaldy
SQO Sybaılas jemqorlyqqa qarsy qyzmet mamandarynyń habarlaýynsha, aktsııaǵa Petropavl qalasynda 6 baǵyt boıynsha júretin 74 avtobýs qatysyp jatyr. Uıymdastyrýshy - «Qyzyljar – adaldyq alańy» jobalyq keńsesi men sybaılas jemqorlyqqa qarsy medıa ortalyqtyń fılıaly. «Avtotransport odaǵy» QB is-sharaǵa qoldaý kórsetti.
El boıynsha mundaı aktsııa ázirshe tek SQO aýmaǵynda ǵana ótip jatyr. Aktsııanyń negizgi maqsaty – qoǵamda sybaılas jemqorlyqqa qarsy mádenıetti qalyptastyrý.
«Qoǵamdyq kólikterge parasattylyq prıntsıperin saqtaýǵa jáne ádepten ozbaýǵa shaqyrǵan japsyrmalar ilindi. Másele joq emes – bar. Ony sheshý úshin jolaýshylardy tasymaldaýshylar men turǵyn úı kommýnaldyq sharýashylyǵy bólimi birlese jumys istep jatyr. Japsyrmada qoǵamdyq baqylaýdyń da nómiri kórsetilgen. Habarlasyp, kýá bolǵan quqyq buzýshylyq jaıynda aıtýǵa bolady», - deıdi SQO boıynsha sybaılas jemqorlyqqa qarsy is-qımyl departamentiniń adaldyq jáne preventsııa basqarmasynyń basshysyDamır Habıbýlın.
Aktsııaǵa qatysyp jatqan barlyq avtobýstar kisi kóp júretin Petropavl qalasynyń ortalyq kóshelerimen ótedi.
«Qoǵamdyq kólikte túrli jaǵdaı bolyp jatady. Keıde kólik júrgizýshisi óreskel minez kórsetedi, jolaýshy tarapynan dórekilik jasalyp jatady. Sondyqtan mundaı aktsııa kerek. Japsyrma eki jaqty da tártipti saqtaýǵa shaqyrady. Quqyq buzylǵan jaǵdaıda kórsetilgen telefon nómirine habarlasýǵa bolady. Árqaısysyn qaraımyz», - deıdi «Avtotransport odaǵy» QB tóraǵasy Galına Semenova.
