Petropavlda Paralımpıada chempıony Erbol Hamıtovke páter kilti tabystaldy
PETROPAVL. KAZINFORM – Petropavlda Naýryz meıramyn toılaý barysynda álemdik deńgeıdegi jarystarda joǵary nátıje kórsetken sportshylar marapattaldy.
Petropavlda bıyl Ulystyń uly kúni erekshe mazmunda ótip jatyr. Qala merekelik atmosferaǵa bólenip, ulttyq dástúrler men zamanaýı úrdister úılesim tapqan is-sharalar uıymdastyryldy. Sondaı-aq mereke aıasynda óńir abyroıyn asqaqtatyp júrgen azamattardy ulyqtaýǵa erekshe mán berildi. Bıyl qysqy sport túrlerinen Soltústik Qazaqstan oblysynyń toǵyz sportshysy halyqaralyq arenalarda joǵary nátıje kórsetip, el namysyn laıyqty qorǵady.
– Aıryqsha atap óterlik sportshylardyń qatarynda XIV qysqy Paralımpıada oıyndarynyń chempıony Erbol Hamıtov bar. Ol el qorjynyna altyn jáne qola medal salyp, zor jetistikke jetti. Shańǵymen júgirý sportynda óner kórsetip júrgen Shýmekovalar da joǵary jetistikterge qol jetkizdi. Ásirese, Germanııada ótken jasóspirimder arasyndaǵy álem chempıonatynda bes altyn jáne bir kúmis medal jeńip alǵan Krıstına Shýmekovany erekshe atap ótken jón. Sondaı-aq, 2026 jylǵy Olımpıada oıyndarynda oblysymyzdan shyqqan jalǵyz sportshy Nadejda Morozova da óńir namysyn abyroımen qorǵady, - dedi oblys ákimi Ǵaýez Nurmuhambetov.
Sportshylardyń eńbegi eleýsiz qalmaı, olarǵa laıyqty qurmet kórsetildi. Erbol Hamıtovke úsh bólmeli páter tabystalsa, Nadejda Morozovaǵa eki bólmeli páter berildi. Al Shýmekovalar otbasyna úsh bólmeli páter kilti tapsyryldy. Budan bólek, birqatar sportshy men jattyqtyrýshylar aqshalaı sertıfıkattarmen marapattaldy.
Buǵan deıin Erbol Hamıtovke demeýshiler atynan Astanadan eki bólmeli páterdiń sertıfıkaty tabystalǵanyn jazǵan edik.