Petropavlda para alǵan kólik ınspektorlary 6 jylǵa sottaldy

PETROPAVL. QazAqparat – Petropavl qalalyq soty 100 myń teńge para alǵan kóliktik baqylaý ınspektsııasynyń eki bas sarapshysyna úkim shyǵardy, dep habarlaıdy QazAqparat tilshisi.

Petropavl qalalyq sotynyń málimetinshe, byltyr 21 sáýir kúni oblystyń kóliktik baqylaý ınspektsııasynyń B. jáne S. degen bas sarapshylary Petropavl-Mamlıýtka avtojolynyń kólik basqarý pýnktine táýliktik aýysymǵa túsken. Jumys barysynda olar jaýapkershiligi shekteýli seriktestikterdiń birine tıesili tranzıttik Kamazdy toqtatyp, 100 myń teńge para talap etken. Sol úshin ınspektsııa mamandary júk kóliginiń kedergisiz júrip-turýyna jaǵdaı jasamaq bolǵan.

Aıyptalýshylar B. jáne S. taǵylǵan aıyptarǵa qarsylyq bildirmeı, óz kinálaryn tolyq moıyndady jáne jasaǵan isine shyn kóńilden ókinish bildirdi.

Qylmystyń bul túrine 7 jyldan 12 jylǵa deıin bas bostandyǵynan aıyrý jáne belgili bir laýazymdy atqarý nemese belgili bir qyzmetpen aınalysý quqyǵynan ómir boıyna aıyrý jazasy kózdelgen.

Sot B. jáne S.-nyń óz kinásin tolyq moıyndap, shyn kóńilmen ókinish bildirýin jazany tómendetetin jaǵdaı dep tanydy. Al adal qyzmet etýge ant qabyldaǵan adamnyń qylmys jasaýy aýyrlatatyn jaǵdaı retinde qabyldandy.

Petropavl qalalyq soty B. jáne S.-ny memlekettik qyzmette ómir boıyna qyzmet atqarý quqyǵynan aıyra otyryp, 6 jylǵa bas bostandyǵynan aıyrdy.