Petropavlda ózin volontermin dep tanystyryp, zeınetkerlerdi aldaǵan áıel ustaldy
PETROPAVL. QazAqparat – Petropavl polıtseıleri ózin volontermin dep tanystyryp, eki zeınetkerdi aldaǵan qala turǵynyn ustady, dep habarlaıdy QazAqparat tilshisi.
SQO Polıtsııa departamenti baspasóz qyzmetiniń málimetinshe, alaıaq áıel egde jastaǵylardy quryǵyna túsiripti. 76 jastaǵy ájeıdiń aıtýynsha, kútpegen meıman ózin «eriktimin» dep tanystyryp, Naýryz meıramyn merekeleýge oraı ákimdiktiń atynan oǵan myń teńge tartý etpekshi bolǵan. Zeınetkerdi buǵan qosa azyq-túlik paketiniń beriletinine jáne ony ózi kelesi kúni ákelip beretinine sendirgen. Qaskóı ájeıge kádesyı bes myń teńgeni berip, qalǵan aqshany qaıtaryp berýdi ótingen. Esh nárseden kúmándanbaǵan zeınetker jalǵan aqshany alyp, 4 myń teńge qaıtaryp beredi.
Budan bólek, ájeıdiń senimine kirgen alaıaq odan jalǵan eki myń teńgeni de usaqtatyp alypty. Dál osyndaı jaǵdaıǵa basqa zeınetker áıel de dýshar boldy. Polıtseıler alaıaq áıeldi izdestirýge jedel kiristi. Táýlik ishinde jedel ýákilder kúdikti 39 jastaǵy qala turǵynyn anyqtap, ustady.
Ol budan buryn da osyndaı qylmys jasaǵany úshin jaýapqa tartylǵan eken.
Alaıaqtyq jáne usaq urlyq faktileri boıynsha sotqa deıingi tergeý júrgizilýde. Ustalǵanǵa qatysty «mindetti kelý» bultartpaý sharasy belgilendi.
«Barlyq turǵyndardy saq bolý jáne egde jastaǵy týǵan-týystaryńyzǵa alaıaqtardyń áreketi týraly eskertýdi ótinemiz. Alaıaqtar ońaı olja tabý úshin koronavırýstyń taralýyna qatysty jaǵdaıdy da óz paıdalaryna asyryp, túrli oqıǵalardy oıdan shyǵarý arqyly aılalaryn júzege asyrýy múmkin», - dedi SQO Polıtsııa departamenti Krımınaldyq polıtsııa basqarmasynyń bastyǵy Petr Klımov.
