Petropavlda ózendi lastaǵan kásiporynǵa aıyppul salyndy
PETROPAVL. QazAqparat - Petropavlda Esildiń eski arnasyna lastanǵan sý qaıdan kelgeni anyqtaldy, dep habarlaıdy QazAqparat tilshisi.
Qańtar aıynda ózen arnasyndaǵy lastanǵan sý týraly ekologtarǵa jergilikti balyqshy habarlaǵan bolatyn.
Ekologııa departamentiniń ókilderi qalanyń turǵyn úı-kommýnaldyq sharýashylyq, jolaýshylar kóligi jáne avtomobıl joldary bólimi osy máselege qatysty jospardan tys tekseris júrgizgenin málimdedi.
«Tekserister nátıjesinde 20-25 qańtar aralyǵynda «Tazartqysh, sý tartqysh jáne sý ótkizgish ǵımarattar» kásiporny óz betimen Esil ózeniniń eski arnasyna 153 myń tekshe metrden astam kólemde sý jiberip, QR Ekologııalyq kodeksiniń birneshe babyn buzǵan», - deıdi ekologııa departamenti basshysynyń orynbasary Azamat Bektasov.
Onyń aıtýynsha, kásiporyn ákimshilik jaýapqa tartylyp, 150 myń teńgeden astam aıyppul salynǵan. Munymen qosa ekologııalyq zańnamanyń buzylýyn joıýǵa uıǵaryldy.
«Óz betimen sý jibergendikten, 30,2 mln teńge mólsherinde qorshaǵan keltirilgen zalaldy óteý týraly kásiporynnyń ústinen shaǵym túsirildi. Mamandandyrylǵan aýdanaralyq ekonomıkalyq sotqa sý nysanyna aǵyn sýlardy jiberýdi toqtatý úshin materıaldar jiberildi. Mindetti ekologııalyq aýdıtti júrgizý týraly materıaldar ázirlendi», - dedi A.Bektasov.
Avtory: Olesıa Jýkoven
