Petropavlda ózbek kásipkerleriniń jármeńkesi ótedi
PETROPAVL. QazAqparat - Maýsymnyń 1-2-si kúnderi Petropavldaǵy ortalyq alańda ózbek kásipkerleriniń jármeńkesi ótedi, dep habarlaıdy QazAqparat tilshisi.
Soltústik Qazaqstan oblysyna Ózbekstannyń Horezm oblysynyń delegatsııasy keldi. Oblys ákiminiń baspasóz qyzmetiniń habarlaýynsha, óńir basshysy Qumar Aqsaqalov Ózbekstannan kelgen delegatsııamen kezdesti. Delegatsııany Horezm oblysy hokımynyń birinshi orynbasary Kýdratbek Igambergenov bastap keldi. Kezdesý barysynda eki tarap kóptegen salada ózara yntymaqtastyq ornatý týraly sóz qozǵady.
«Jýyrda eki eldiń basshylary kezdesti. Birneshe kelisimge qol qoıyldy. Biz óńirlik deńgeıde jumys jasaýǵa daıynbyz. Ózbek bıznesmenderin áriptestikke shaqyramyn. Bizdiń jerimiz qunarly. Óńirge ınvestıtsııa quıatyn bolsańyzdar jeńildikter bar. Birlesken jobalardy júzege asyramyz degen senimdemin», - dedi Qumar Aqsaqalov.
Horezm oblysy hokımynyń birinshi orynbasary Kýdratbek Igambergenov ózbek taraby ózara yntymaqtastyqqa daıyn ekendigin jetkizdi.
«Qonaqjaılyq tanytqanyńyz úshin raqmet. Qazaqstan Ózbekstan úshin strategııalyq seriktes. Bizdiń tarıhymyz ortaq. Biz qazaq dostarymyzben birlesken jobalardy júzege asyrýǵa bar jaǵdaıdy jasaımyz. Seriktesterdi barynsha qoldaımyz», - dedi Kýdratbek Igambergenov
Petropavlda SQO jáne Horezm oblysynyń bıznesmenderi B2B formatynda kezdesedi.
