Petropavlda óz aktsıonerlerin taqyrǵa otyrǵyzǵan zaýyttyń sheshimin sot zańsyz dep tanydy
PETROPAVL. KAZINFORM — Petropavldaǵy ZIKSTO zaýyty aktsıoner bolyp keletin óz zeınetkerleriniń quqyǵyn buzyp, másele sotta qaraldy.
Kásiporyn zeınetkerleriniń aıtýynsha, ZIKSTO zeınet demalysyna shyqqan ár jumysshysyna aktsııa syılaǵan. Olar bertinge deıin jylda dıvıdend alyp kelgen. Keıin aktsııalarynyń jaı qaǵaz bolyp qalǵanyn bilip, sotqa shaǵymdanýǵa týra keldi.
— Olar zaýytty 91 mln teńgege ǵana baǵalap, ár aktsıonerge bólgen kezde, bir aktsııanyń quny 16 teńge ǵana shyǵyp otyr. Bizdiń esebimizshe, eń keminde 10 myń teńge bolýy kerek, — deıdi zaýyt zeınetkerleri.
Іsti Soltústik Qazaqstan oblysynyń mamandandyrylǵan aýdanaralyq ekonomıkalyq soty qarap, aryzdanýshylardyń talabyn qanaǵattandyrdy.
SQO sotynyń málimetinshe, «ZIKSTO» AQ qaıta uıymdastyrý kezinde aktsınerler zańsyz shettetilgen. Olar kezekten tys jalpy jınalystar týraly zańnama men jarǵy talaptaryna saı haabarlandyrylmaǵan. Saldarynan aktsıonerler korporatıvtik basqarýdan alynyp, óz quqyqtaryn paıdalaný múmkindiginen aırylǵan.
Sot 2023 jylǵy 19 maýsymda Aıgúl Myrzahanova men «ZIKSTO» AQ arasynda jasalǵan 260 myń qarapaıym jáne 327 myń artyqshylyǵy bar aktsııalardy satý-satyp alý shartynyń kúshin joıdy.
2023 jyldyń 29 maýsymynda bolǵan aktsıonerlerdiń kezekten tys jalpy jınalysynyń sheshimin — 490 myń artyqshylyǵy bar aktsııany jaı aktsııalarǵa aıyrbastaýdy zańsyz dep tapty.
2023 jylǵy 15 tamyzda Aıgúl Myrzahanova men «PremıýmVagonKomplekt» JShS arasynda jasalǵan aktsııalardy satý-satyp alý shartyn jáne 2024 jylǵy 4 shildede «ZIKSTO» AQ erikti túrde «ZIKSTO» JShS-ne qaıta qurý týraly jalǵyz aktsıonerdiń sheshimin joqqa shyǵardy. Sot zańdy kúshine engen joq.
Buǵan deıin Petropavlda TÚKSh bóliminiń basshysyna 3 mln teńge aıyppul salynǵanyn jazǵan edik.