Petropavlda ótkir jaǵymsyz ıis paıda bolyp, turǵyndardyń mazasyn qashyrdy
PETROPAVL. KAZINFORM — Qala turǵyndary kesh bolsa jaǵymsyz ıistiń saldarynan dalaǵa shyǵa almaı, terezeni jaýyp otyrýǵa májbúr.
Petropavl turǵyndary birer aptadan beri aýada jaǵymsyz ıistiń paıda bolǵanyn aıtyp, shaǵymdanyp jatyr. Ótkir ıis qalany túgel jaılap, ásirese keshki jáne túngi ýaqytta kúsheıedi. Turǵyndardyń aıtýynsha, buryn shirigen jumyrtqanyń ıisi shyqsa, qazir maldyń qıyna uqsas ótkir ıis qolqany qabady.
Soltústik Qazaqstan oblystyq ekologııa departamentiniń málimetinshe, olarǵa atmosferalyq aýa sapasy normatıvteriniń buzylǵany nemese aýaǵa zııandy zattardyń taralý faktileri jóninde aqparat túspegen.
— AirKZ qosymshasynyń derekterine sáıkes, sońǵy kúnderi kórsetilgen ýaqyt aralyǵynda aýa quramyndaǵy lastaýshy zattardyń shekti jol berilgen kontsentratsııadan asqany anyqtalmady, — deıdi ekologtar.
Buǵan deıin Petropavlda sarqyndy sý jınalatyn «Bıotoǵan» kún jylynsa kúkirtsýtek bólip, aýany lastap keldi. 2021 jyly jaǵymsyz ıisti joıý úshin «Qyzyljar-Sý» JShS «Sýdyń ǵylymı-tehnologııalyq ortalyǵy» JShS-men kelisimge otyryp, bıotoǵanǵa hlorella mıkrobaldyrlaryn saldy.
Joba bastapqyda úsh jylǵa shaqtalǵanymen, sarqyndy sý jınalatyn toǵan áli de hlorellamen tazartylyp jatyr.
— Petropavldaǵy jaǵymsyz ıiske qatysty bizdiń kásiporynǵa eshqandaı shaǵym túsken joq. «Qyzyljar sý» JShS-niń barlyq nysandary shtattyq rejımde jumys istep tur. Bıotoǵanǵa hlorella engizý jumystary bekitilgen josparǵa sáıkes júrgizilý ústinde.
Aýa raıynyń ystyq bolýyna baılanysty ártúrli nysandardan shyǵatyn ıister kúshtirek sezilýi múmkin. Sondyqtan jaǵymsyz ıistiń shyǵýyna bir ǵana biz sebepker emespiz, — deıdi «Qyzyljar sý» JShS ókilderi.
Buǵan deıin Atyraýda jaǵymsyz ıiske baılanysty aýa sapasy tekserilip jatqanyn jazǵan edik.
