Petropavlda ótken sabantoıda Tatarstan basshysy búldirshinniń tusaýyn kesti
PETROPAVL. KAZINFORM – Ótken demalys kúnderi Petropavlda QYZYLJAR SABANTUI merekesi ótip, qalanyń ortalyq alańynda ıne shanshar jer bolmady.
Tatar ultynyń dástúrli meıramy bıyl keń kólemde, jańa formatta atalyp ótti. Іs-sharaǵa Tatarstannan arnaıy qonaqtar keldi. Delegatsııany Tatarstan Respýblıkasynyń Raısy Rýstam Mınnıhanov bastady.
Merekede ulttyq salt-dástúrler, teatrlandyrylǵan qoıylymdar, kontserttik baǵdarlamalar, qolóner sheberleriniń kórmeleri, ulttyq oıyndar men sporttyq jarystar uıymdastyryldy.
Eń áserli sátterdiń biri – tusaýkeser rásimi boldy.
Tatarstan basshysy Rýstam Mınnıhanov qazaqtyń dástúrimen aıaǵyn endi táı-táı basqan búldirshinniń tusaýyn kesip, aq jol tiledi. Jánibek kelesi aıda bir jasqa tolady. Búldirshin erli-zaıypty Shyńǵys pen Gúlnaranyń ekinshi uly. Shyńǵys Esendikov jeke kásipker, zaıyby býhgalter bolyp jumys isteıdi.
Olardyń aıtýynsha, qurmetti qonaqqa uldarynyń tusaýyn kestirý úshin uıymdastyrýshylardyń kishigirim baıqaýynan ótýge týra kelgen.
- Tuńǵyshymyzdyń esimi – Jáńgir. Ekinshi ulymyz Jánibektiń tusaýyn sáti túsip, Tatarstan basshysy Rýstam Mınnıhanov kesti, bul biz úshin zor mártebe jáne óte keremet estelik bolyp qalmaq. Onyń aq batasymen ulymyzdyń ómir joly jarqyn, baqytty, tabysty ári berekeli bolady dep shyn júrekten senemiz. Jánibegimizdiń árbir qadamyn ıgilikke bastap, asqar asýlardy baǵyndyrýdy násip etsin, - deıdi Esendikovtar otbasy.
Buǵan deıin Mońǵolııadaǵy dástúrli Naadam merekesi jaıynda jazǵan edik.
