Petropavlda ótken merekelik aktsııada 500 jalaý taratyldy
Merekelik is-sharany uıymdastyrýshylar – SQO jastar resýrstyq ortalyǵy. Belsendi jastardy, stýdentterdi jáne volonterlerdi biriktirgen «Meniń týym» aktsııasy bir mezette Petropavl qalasy men óńirdiń barlyq aýdan ortalyqtarynda ótti.
«Meniń týym» aktsııasy aıasynda bizdiń belsendiler kóp qabatty úılerdiń balkondaryna týymyzdy ildi. Petropavl qalasyndaǵy ortalyq kóshelerde júrginshilerge jalaýshalardy úlestiremiz. Jastarymyz osylaısha, óz otansúıgishtikterin kórsetti, qurmetteýge shaqyrdy», - deıdi Petropavl qalalyq Jastar resýrstyq ortalyǵynyń jetekshisi Azat Muhametjanov.
Petropavlda Memlekettik rámizder kúnine oraı uıymdastyrylǵan is-shara QR Konstıtýtsııasy kóshesindegi ortalyq alańnan bastaý aldy. Bul – halyq kóp júretin negizgi kóshelerdiń biri. Turǵyndar volonterler taratqan jalaýdy qýanyshpen qabyldady.
«Jastar ıgi shara ótkizip jatyr. Kúıbeń tirlikpen osyndaı mańyzdy merekeni umytyp ketetin kezder bolady. Qolyma Qazaqstannyń týyn ustatqanda kóńilim bir kóterilip qaldy. Óıtkeni, kók tý - bizdiń egemen eldigimizdiń nyshany. Qyz-jigitterdiń bul aktsııaǵa belsendi qatysyp jatqanyn kórip qýandym», - deıdi Petropavl turǵyny Zýrash Tortaeva.
Petropavlda merekelik is-shara aıasynda turǵyndarǵa 500 tý úlestirildi. «Meniń týym» respýblıkalyq aktsııasy óńirdiń barlyq aýdan ortalyqtaryn da qamtydy.
