Petropavlda ótken komandalyq aıtysta astanalyq ónerpazdar jeńiske jetti
PETROPAVL. KAZINFORM – Petropavlda komandalyq aıtys mega-jobasy aıasynda jergilikti ónerpazdar astanalyqtarmen respýblıkalyq aıtystyń ekinshi aınalymynda kezdesti.
Aıtysker-aqyndar men jyrshy-termeshilerdiń halyqaralyq odaǵy jáne «AMANAT» partııasy uıymdastyrǵan joba byltyr bastalyp, bıyl jalǵasyn tapty. El kóleminde uıymdastyrylǵan mega jobaǵa qatysqan 20 komandanyń 10-y kelesi kezeńge ótip baq synady. Onyń qatarynda soltústiktiń ónerpazdary da bar, birinshi kezeńde olar Shyǵys Qazaqstan oblysynyń komandasymen sahnada kezdesip, jeńiske jetti.
Bul jolǵy kezeń «Eńbek adamy - el maqtanashy» taqyrybynda ótti.
- Birinshi aınalymnan ótken 10 qurama ishinen jartylaı fınalǵa ótkenderdi saralaıtyn bolamyz. Jartylaı fınal mamyr aıynda Astanada ótedi. Búgin Soltústik Qazaqstan men Astana qalasynyń quramalary saıysady. Olar kórermenge qazaqtyń bekzat óneri - aıtysty kórsetedi degen oıdamyn, - dedi mega-jobanyń avtory Amanjol Áltaev.
Qazylar alqasyn Qazaqstannyń eńbek sińirgen qaıratkeri Júrsin Erman bastady. Ár óner kórsetken juptyń baǵasyn sol salanyń mamany ǵana baǵalaı aldy.
Qos óńir arasynda ótken óner báıgesinde aqyndar «túre», «súre», «qaıym» jáne «qyz ben jigit aıtysy» janrlary boıynsha synǵa tústi. Sonymen qatar kúı, jyr, terme jáne dástúrli án boıynsha da myqtylar anyqtaldy. Mega jobanyń bul kezeńinde teriskeı komandasynda ózgeris bar. Termeni Meıramgúl Zdýalıeva aıtsa, kúı tartýǵa Ashat Ǵaleev shyqty. Qyz ben jigit aıtysynda Berdenbek Myrzat baq synady.
«Osydan bir aı buryn, Naýryz merekesine oraı uıymdastyrylǵan aıtysta komandamyz soltústiktiń ónerin kórsetip, sal-seri, batyrlardyń urpaǵy ekenimizdi dáleldeı aldyq. Jyr-terme, dástúrli án synyna túsetin jigitterimiz saıdyń tasyndaı iriktelgen. Osy joly da jeńisten úmit bar. Astana qalasynyń komandasyn aıtysker aqyn Serikzat Dúısenǵazy bastap kelip otyr. Olar da tis qaqqan ónerpazdar. Biraq, bizdiń qyz-jigitter de osal emes. Babalardan mıras bolyp qalǵan ónerdi ulyqtap júrgen jandar, - dedi uıymdastyrýshy ári aıtysker aqyn Jarqyn Juparhan.
Bir aıda ekinshi ret ótip otyrǵan dodaǵa kelgen qaýym kóp. Qazaqtyń kúmbirlegen kúıi men tógilgen jyry kelgen kórermenniń delebesin qozdyryp, qıqýǵa basty. Esildiń jaǵasynda týǵan uly tulǵalardyń mereıtoılary týraly da sóz qozǵaldy. Bul Qojabergen jyraý men Shal aqyn, Segiz seriniń óneri áli de óshpeı kele jatqanyn kórsetedi. Qazaqtyń qara dombyrasyn shertip, túrli kúıdi tógiltken, sýyryp salmalyǵymen kózge túsken jáne de qazaqtyń keń dalasyna án salyp daýysyn jetkizgen ónerpazdar kórermen qoshemetine bólendi. Aıtyskerler bolsa qaǵytpa sózder arqyly bir-birin shymshyp ótip, qoǵamdaǵy ózekti máselelerdi de kótere bildi.
Dodanyń qorytyndysy boıynsha Astana qalasynyń komandasy bas júldeni jeńip alyp, respýblıkalyq aıtystyń kelesi kezeńine joldama aldy. Jeńimpaz komanda múshelerine: ár aqynǵa – 500 myń teńgeden, al jyrshy, termeshi, dástúrli ánshi jáne kúıshilerge – 250 myń teńgeden berildi.
Buǵan deıin SQO-da «Qazaq tili» qoǵamynyń 35 jyldyq mereıtoıy atalyp ótkenin jazǵan edik.