Petropavlda ótken aıtystyń bas júldesin Serik Qusanbaev jeńip aldy
ÓSKEMEN. QazAqparat - Petropavl qalasynda aqyn Erik Asqarovtyń 60 jyldyǵyna oraı ótken respýblıkalyq aıtysta óskemendik aıtysker Serik Qusanbaev bas júlde aldy, dep habarlaıdy QazAqparat tilshisi.
Aıtysta óziniń aıqyn qoltańbasyn qaldyryp, dramatýrgııa men poezııa áleminde ult rýhanııatyna súbeli úles qosqan Erik Asqarovtyń rýhyn asqaqtatý úshin Qyzyljarda elimizdiń ár buryshynan 22 aıtýly aıtysker aqyn bas qosqan bolatyn. Aıtys súıer qaýym bul dodaǵa aldyn ala «retro aıtys» dep aıdar taǵyp úlgerdi. Óıtkeni sahnaǵa E.Asqarovpen birge aıtysqan aǵa býyn ókilderi men búginde alamannyń aldyn bermeı júrgen áıgili aqyndar qatar shyqqan bolatyn.
Eki aınalymǵa sozylǵan jyr jármeńkesinde «Solaqaı seri» atanǵan óskemendik aqyn Serik Qusanbaev bas júldege ıe bolyp, 2 000 000 teńgeni qanyjaǵasyna baılady.
«Aıtystyń birinshi oryny Túrkistan oblysynan kelgen Marjan Esjanovaǵa buıyrsa, ekinshi oryn qaraǵandylyq Amanjol Áltaevtyń qanjyǵasynda ketti. Úshinshi orynnyń júldesin Bekarys Shoıbekov pen Muhtar Nııazov ıelendi. Serik Qalıev pen Qudaıberli Myrzabekov yntalandyrý syılyǵyna ıe boldy. Qalǵan qatysýshylardyń barlyǵyna 200 myń teńgeniń dıplomy tabystaldy» - deıdi sharany uıymdastyrýshylardyń biri Jarqyn Juparhan.
Jerlesimizdi aıshyqty jeńisimen quttyqtaý úshin telefon shaldyq.
«Erik Asqarovpen aıtys alańynda jolymyz birneshe ret túıisti. Tilip aıtatyn, taýyp aıtatyn, talatty aıtysker edi. Jasy úlken bolǵandyqtan ózime rýhanı aǵa tutatynmyn. Sondyqtan, Altaıdan at arytyp, osy toıǵa arnaıy keldim. Birinshi aınalymda eki qazy «9» qoıyp, múmkindigimdi tómendetip jibergen. Rınat Zaıtov sol olqylyqtyń ornyn toltyryp, óz jolyn maǵan berdi. Aqtyq synda Qudaıberli Myrzabekpen jolym túıisti» - deıdi aqynnyń ózi.
