Petropavlda otbasynyń berekesin alǵan 61 adam jazaǵa tartyldy
PETROPAVL. QazAqparat - Soltústik Qazaqstan oblysynda «Otbasyndaǵy zorlyq-zombylyqqa jol joq» atty respýblıkalyq aktsııa ótip, shańyraqtyń shyrqyn buzǵan 61 adam jaýapkershilikke tartyldy, dep habarlaıdy QazAqparat tilshisi.
SQO PD baspasóz qyzmetiniń habarlaýynsha, aktsııanyń maqsaty - áıelder quqyǵynyń saqtalýyn qadaǵalap, ana men balany qorǵaý. Úsh kúnge jalǵasqan is-shara barysynda jaǵdaıy nashar qolaısyz otbasy retinde esepte turǵan, buǵan deıin mastyqtyń saldarynan týyndaǵan janjalǵa baılanysty shaqyrtý bolǵan 145 úıge reıd jasaldy.
«Úıdegi zorlyq-zombylyqty shydap kerek emes. Jaǵdaı barǵan saıyn qıyndaı túsýi múmkin. Áıelderdiń kópshiligi polıtsııaǵa kúıeýiniń ústinen aryzdansa jaǵdaı ýshyǵyp, aıyrylysyp ketetindeı kórinedi. Biraq olaı emes. Kerisinshe, mamandardyń aralasýynan keıin, bilikti kómek kórsetilgen soń otbasydaǵy ahýal jaqsaryp jatady», - deıdi Petropavl polıtsııa basqarmasynyń jergilikti polıtsııa qyzmeti bólimi basshysynyń mindetin atqarýshy Álibek Ǵabdýlın.
Sondyqtan úı-úıdi aralaýdaǵy basty maqsat - aqparattyq-túsindirý jumystaryn júrgizý. Áıeldermen sóılesý barysynda tártip saqshylary olarǵa arnaıy qyzmetterdiń telefon nómirin beredi. Máselen, 52-98-86 nómirinde otyrǵan áıelderdi qoldaý ortalyǵyna habarlasý arqyly zańdy jáne psıhologııalyq kómek alýǵa bolady eken.
Aktsııa aıasynda 57 adamǵa qorǵaý nusqamasy berilip, tórteýiniń júris-turysyna erekshe talaptar qoıyldy. Sondaı-aq polıtseıler jazǵy lagerlerde balalarmen kezdesip, túsindirý jumystaryn júrgizdi. Óıtkeni mamandardyń aıtýynsha, shańyraqtaǵy janjaldan eń kóp zardap shegetinder - balalar.
