Petropavlda «Otbasy kabıneti» jumys isteıdi

PETROPAVL. QazAqparat - Ajyrasýlardy azaıtý maqsatynda Petropavl qalasynda «Otbasy kabıneti» jumys istep jatyr, dep habarlaıdy QazAqparat tilshisi.

2 apta ishinde «Otbasy kabınetine» 26 erli-zaıypty kómek surap kelgen. Otbasynyń yntymaq-birligin saqtaýǵa kómektesýdi maqsat etken maman olarmen bir aı jumys isteıdi. Kabınette psıhologpen erkin sóılesýi úshin jaıly oryn jáne balalarǵa arnalǵan oıyn alańy qarastyrylǵan.

«Mundaı kabınetti ashýdaǵy basty maqsat - óńirimizde shańyraǵy shaıqalýǵa shaq turǵan otbasylarǵa kómektesý. Olardy tatýlastyryp, shańyraqty saqtap qalýymyz kerek. Oblysta jyldyń basynan 193 ótinish tústi. Onyń 150-i qaralyp, sot sheshimi boıynsha 116 otbasy, ókinishke oraı, ajyrasty. 45-i tatýlasty. Qalǵandarynyń aryzdary áli qaralýda», - deıdi Petropavl №2-shi qalalyq sotynyń tóraǵasy Dınara Baızaqova.

Mamandardyń aıtýynsha, otbasyndaǵy zorlyq-zombylyq, materıaldyq másele shańyraqtyń shaıqalýyna ákeledi. Sondaı-aq ajyrasatyndardyń basym bóligi 8-15 jyl otaý qurǵan orta jastaǵy juptar.

SQO statıstıka departamentiniń málimetinshe, byltyr óńirde 3 605 jup shańyraq qursa, 2107 otbasy ajyrasyp ketken. Ókinishke oraı úılenetinderdiń sany 2017 jylmen salystyrǵanda 5,9% azaıyp, ajyrasý 5% kóbeıip otyr.

«Otbasylyq sot» jobasy aıasynda «Otbasy kabıneti» elimizdiń barlyq oblystarynda ashylady dep josparlanǵan.