Petropavlda otbasyna zorlyq-zombylyq kórsetip kelgen er adam qamaýǵa alyndy

ASTANA. KAZINFORM — Petropavl qalasynyń 38 jastaǵy turǵyny uryp-soǵý faktisi boıynsha polıtsııa jan-jaqty tekseris júrgizip jatyr, dep habarlaıdy SQO PD baspasóz qyzmeti.

SQO PD qoǵamdyq qaýipsizdik basqarmasynyń bastyǵy Álibek Ǵabdýllınniń sózinshe, atalǵan fakti boıynsha qylmystyq is qozǵalyp, onyń aıasynda barlyq qajetti tergeý áreketteri júzege asyrylyp jatyr.

Buǵan deıin áıelge qatysty quqyqqa qaıshy áreketter týraly aqparat áleýmettik jelilerde taraǵan bolatyn.

Otbasynyń turǵylyqty jerine dereý polıtsııa qyzmetkerleri men qorǵanshylyq jáne qamqorshylyq organdarynyń mamandary shyqty.

Sol kúni qajetti bastapqy protsessýaldyq is-áreketter júrgizildi.

— Áıeldiń aryzy boıynsha otbasylyq-turmystyq qatynastar salasyndaǵy quqyqqa qaıshy áreketter boıynsha ákimshilik is qozǵaldy. Quqyq buzýshy ákimshilik qamaqqa alyndy. Sonymen qatar, sot onyń minez-qulqyna 12 aı merzimge erekshe talaptar belgiledi, bul onyń áıel men balalaryn olardyń kelisiminsiz kórýine tyıym salady. Quqyq buzýshyǵa qatysty materıaldar qala ákimdigi janyndaǵy Kámeletke tolmaǵandar isteri jáne olardyń quqyqtaryn qorǵaý jónindegi komıssııanyń qaraýyna jiberildi, — dedi Álibek Ǵabdýllın.

Oblystyq polıtsııa jaǵdaıdyń quqyq qorǵaý organdary men qorǵanshylyq qyzmetiniń baqylaýynda ekenin atap ótti.

Basqarma bastyǵynyń sózinshe, áıel men balalardyń qaýipsizdigin qamtamasyz etý boıynsha barlyq sharalar tolyq kólemde qabyldandy. Qazirgi ýaqytta balalar anasymen birge ájesiniń qaraýynda.

Sondaı-aq, buǵan deıin uryp-soǵý faktisi boıynsha ishki ister organdaryna aryz túspegeni aıtylady. Osyndaı jaǵdaılarda dereý 102 nómirine habarlaý qajet. Áıelder men balalarǵa qatysty zorlyq-zombylyq faktileri boıynsha respýblıkalyq senim telefony 111 jumys isteıdi.

Osyǵan deıin Atyraýda jyl basynan beri zorlyq-zombylyq deregimen 30 qylmystyq is tirkelgenin jazǵanbyz.