Petropavlda otandyq jarma shyǵarylady
PETROPAVL. QazAqparat - Petropavlda qaraqumyq pen dándi daqyldar óndiretin alǵashqy tseh ashyldy, dep habarlaıdy QazAqparat tilshisi.
«Damý» qory» AQ óńirlik fılıalynyń baspasóz qyzmeti málim etkendeı, «RahatOpt» JShS osy jobany júzege asyrý úshin «Bıznestiń jol kartasy 2020» memlekettik baǵdarlamasyn qoldanǵan.
Byltyr kompanııa qordyń kepilimen 130 mln teńge aldy. Bul qarjyǵa «Olıs» ýkraındyq kompanııasynyń azyq-túlik jarmasyn óndiretin jabdyqtardy satyp alǵan.
Óndiristik jeli jartylaı iske qosyldy. Kompanııa shıkizatty jergilikti sharýa qojalyqtarynan satyp alýda.
«Bizdiń un tartatyn óndirisimiz jáne jarma satýdan tájirıbemiz bar. Naryqty zerttep, ónimniń suranysy joǵary túrin tańdadyq. Óndiristik ǵımarat pen astyqtardy tazalaıtyn jabdyqtar satyp aldyq. Búginde qaraqumyq, arpa jarmasy, tary, bıdaı jarmasyn daıyndap jatyrmyz. Tutynýshylar úshin jarma baǵasy arzan bolady», - dedi kompanııa basshysy Akıf Velıev.
«RahatOpt» JShS bir aıda 40 tonna daıyn ónim óndirýdi josparlap otyr. Bıyl kompanııa Qazaqstannyń birneshe qalasynan óz fılıaldaryn ashpaq.
