Petropavlda orys mektepterinde qazaq synyby ashylǵanymen, bala sany jetpeı jatyr

PETROPAVL. QazAqparat – Soltústik Qazaqstan oblysynda 454 mekteptiń árbir tórtinshisi ǵana taza qazaq tilinde sabaq beredi. Petropavldaǵy úsh orys mektebinde qazaq synyptary ashylǵanymen, bala sanyn jetkize almaı jatyr, dep habarlaıdy QazAqparat tilshisi.

Petropavlda «AMANAT» partııasy SQO fılıaly janyndaǵy «MIRAS» qoǵamdyq keńesiniń kezekti otyrysy ótti.

Oblystyq bilim basqarmasy basshysynyń orynbasary Elena Gontardiń aıtýynsha, óńirde 454 jalpy bilim beretin mektep bar: 112-si nemese 24,7% qazaq tilinde, 21,1% nemese 96-sy - aralas jáne 54,2% nemese 246-sy orys tilinde oqytady.

«Osy oqý jylynda qazaq tilinde oqıtyn balalardyń sanyn arttyrý maqsatynda oblystyń 5 aýdanynda 8 mektepte qazaq tilinde synyptar ashyldy. Sondaı-aq, Chkalov arnaıy mektep-ınternatynda erekshe bilim berý qajettiligi bar balalarǵa arnalǵan qazaq tilinde oqytatyn synyp ashyldy. Osy oqý jylynda 1 synypqa 7739 bala qabyldandy, onyń ishinde 1775 bala qazaq tilinde oqyp jatyr, bul 23% quraıdy», - deıdi Elena Gontar.

Petropavl boıynsha 36 mektep bolsa, onyń ishinde taza qazaq mektebiniń sany altaý ǵana. Bul bilim mekemelerindegi oqýshy sany - 3891.

Oblys ortalyǵyndaǵy 5 aralas mektepte 1123 bala qazaqsha bilim alyp jatyr.

Sonymen qazaq tilinde bilim alyp otyrǵan qalalyq oqýshylardyń sany- 5014, jalpy 26790 oqýshy bolsa, bul sonyń 18,7 % ǵana.

«Qazaq tilinde oqıtyn balalardyń sanyn arttyrý maqsatynda jańa 2023-2024 oqý jylynda Petropavldyń orys tilinde oqytatyn 3 ınnovatsııalyq mektebinde 1-synyp ashylady: Birinshi qalalyq ІT-lıtseı - 20, «BEST» gımnazııasy - 20, Birinshi gımnazııa – 25 búldirshindi qabyldamaq.

Alaıda sáýir aıynan beri «BEST» gımnazııasyna - 9, «Birinshi qalalyq jalpy bilim beretin IT- lıtseıge - 11, Birinshi gımnazııaǵa - 4 oqýshy ǵana tirkeldi», - deıdi Elena Gontar.

Bul jaıynda áleýmettik jelilerge, memlekettik mekemeniń saıtyna, qalalyq bilim bóliminiń saıtyna, Instagram, Facebook, Telegram kanaldarynda habarlandyrý berilgenimen ata-analar balasyn jańadan ashylǵan qazaq synyptaryna berýge asyǵar emes.

«Árqaısysyna 10-15 bala jınalsa da, qazaq synyptary ashylady. Qazaqsha oqýǵa nıet bildirgen búldirshinder eshqandaı test tapsyrmaıdy, áńgimelesý nátıjesimen qabyldanady. Sondaı-aq bul balalarǵa uzartylǵan kún toby tegin bolmaq. Sebebi, oblystyq bilim basqarmasy júrgizgen saýalnamadan bilgenimiz, ata-analardyń 42% ózderi qazaqsha bilmegendikten, úı tapsyrmasyn oryndaýda qınalady eken», - deıdi Petropavl qalalyq bilim bólimi basshysynyń orynbasary Bulbul Ahmadı.