Petropavlda órtten úsh adam qaza tapty
PETROPAVL. QazAqparat – Petropavl qalasyndaǵy Jumysshy kentindegi úıden órt shyǵyp, saldarynan úsh adam mert boldy, dep habarlaıdy QazAqparat tilshisi.
Soltústik Qazaqstan oblysy Tótenshe jaǵdaılar departamenti baspasóz qyzmetiniń habarlaýynsha, 1 qańtar kúni saǵat 17.00-de «101» telefon nómirine Petropavldyń Jumysshy kentindegi Panfılov kóshesindegi 72- úıde qoıý qara tútin shyǵyp jatqandyǵy jóninde habar túsedi.
«Oqıǵa ornyna órt sóndirýshiler 8 mınýtta jetti. Shpaldan salynǵan baspanadan lapyldap janǵan ot kórinbegenimen, qatty tútindep jatty. Kórshiler úı ishinde adamdar bolýy múmkin ekenin aıtty», - deıdi órt sóndirýshiler.
Qutqarýshylar úı ishinen ıis tıgen 28 jastaǵy úı ıesi áıeldiń jáne onyń 3 jáne 1 jastaǵy eki ulynyń denesin alyp shyqty. Órttiń saldarynan jıhaz ben turmystyq tehnıka janyp ketti. Mamandardyń bastapqy boljamynsha, órttiń shyǵýyna elektr jelisiniń qysqa tuıyqtalýy sebep bolýy múmkin.
