Petropavlda órtten tórt adam qutqaryldy

PETROPAVL. QazAqparat – Petropavlda ótken táýlikte qutqarýshylar 13 ret shaqyrtýǵa shyǵyp, órtten tórt adamdy qutqardy, dep habarlaıdy QazAqparat tilshisi.

Soltústik Qazaqstan oblysy tótenshe jaǵdaılar departamenti baspasóz qyzmetiniń málimetinshe, Petropavlda 101 qyzmetine 13 ret shaqyrtý túsken. Onyń ishinde úsheýi turmystyq órtke qatysty, 8 jaǵdaıda janý jáne 2 jaǵdaıda qutqarýshylardyń kómegi kerek bolǵan.

16 qarasha kúni saǵat 18.42 mınýt ketkende Petropavldaǵy Nazarbaev kóshesindegi 234 -úıde órt shyqqandyǵy týraly habar túsedi. Bes qabatty turǵyn úıdiń ekinshi qabatyndaǵy órtten arnaıy saty arqyly 3 adam qutqarylyp, taǵy 15 turǵyn, sonyń ishinde 3 bala qaýipsiz jerge shyǵaryldy. Oqıys oqıǵadan eshkim zardap shekpegen. Órttiń shyǵýyna tamaqty gaz plıtasynda baqylaýsyz qaldyrý sebep bolǵan.

Saǵat 15.07-te J.Jabaev kóshesindegi 177-úıde jylý kollektorynda órt shyqqandyǵy týraly habar túsken. Órt sóndirýshiler turaqty mekenjaıy joq adamdy alyp shyǵyp, qutqaryp qaldy. Turmystyq qaldyqtar janǵan. Órt 20 mınýttyń ishinde tolyq sóndirildi.

Osy kúni Petropavlda taǵy eki apattyq-qutqarý jumystary júrgizilip, qutqarýshylar turǵyndardyń abaısyzda jabylyp qalǵan páterge kireberis esikti ashyp berdi.