Petropavlda órtten qutqarylǵan 42 jastaǵy er adam aýyr halde jatyr
PETROPAVL. QazAqparat - Petropavlda kópqabatty úıden órt shyǵyp, mamandar jalyndaǵan páterden qatty kúıik alǵan er adamdy alyp shyqty, dep habarlaıdy QazAqparat tilshisi.
Tótenshe jaǵdaılar komıtetiniń málimetinshe, oqys oqıǵa Petropavlda 10 qyrkúıek kúni bolǵan. Saǵat 16:43-te órt sóndirý qyzmetine Astana kóshesindegi bes qabatty úıden órt shyqqany jóninde habar kelip túsken.
Órt sóndirýshiler kelgende úıdiń úshinshi qabatynan qalyń tútin shyǵyp jatqan. Jalynmen kúrese júrip, mamandar 50 adamdy, sonyń ishinde 15 balany qaýipsiz jerge shyǵarady.
Órtke oranǵan páterden avtosatynyń kómegimen 42 jastaǵy er adam qutqaryldy. Denesiniń 85% kúıik shalǵan ol aýyr halde aýrýhanaǵa jetkizildi.
Sanaýly mınýtta jalyndy aýyzdyqtaǵan órt sóndirýshilerdiń aıtýynsha, páterdegi 2 sharshy metr aýmaqta ornalasqan jıhaz janǵan. Órttiń shyǵý sebebi anyqtalyp jatyr.
