Petropavlda órtten 3 adam qaza tapty: qylmystyq is qozǵaldy

Petropavlda jeke turǵyn úıde qaza tapqan úsh adamnyń otbasyna jergilikti atqarýshy organ tarapynan kómek kórsetiledi. Qazirgi ýaqytta qylmystyq is qozǵalyp, oqıǵanyń mán-jaıy anyqtalyp jatyr», - dep habarlaıdy QazAqparat tilshisi.

Soltústik Qazaqstan oblystyq tótenshe jaǵdaılar departamentiniń jedel-tergeý toby oqıǵa ornynda jumys istep jatyr. Tıisti saraptamalar júrgiziledi. Qylmystyq is qozǵaldy.

«Úsh adamnyń denesi úıdiń kireberisinen tabyldy. Olar: 2003 jylǵy kelinshek, 2018 jyly týǵan ul jáne 2022 jyly týǵan qyz bala. Oqıǵa ornyn qaraý kezinde peshtiń jaǵylmaǵandyǵyn kórdik. Aldyn ala boljam boıynsha órt elektr jelileriniń qysqa tuıyqtalýynan shyǵýy múmkin, tekseris kezinde úıdiń tóbesiniń qatty kúıgenin baıqadyq», - deıdi SQO TJD basqarmasynyń bastyǵy Aslan Ahmetjanov.

Bul baspana jalǵa berilip kelgen. Qaza tapqan 20 jastaǵy áıel birden asqan qyzymen, kúıeýimen jáne kúıeýiniń 40 jastaǵy anasy 5 jasar ulymen birge turǵan.

Enesi sol kúni jumysta bolǵan, al er adamdy uıyqtap jatqan jerinen áıeli oıatqan eken, biraq ol úıdegilerdi qutqaryp úlgermegen.

Petropavl ákimdigi zardap shekkenderge kómek kórsetpek.

«Keshe qalamyzda qaıǵyly jaǵdaı boldy. Qyzyl jalyn úsh adamnyń ómirin áketti.

Qaza tapqan adamdardyń týǵandaryna qaıǵyryp kóńil aıtamyn.

Jergilikti atqarýshy organ tarapynan jerleý rásimine, ýaqytsha jaldamaly páterge, basqa da qajettilikterge qarjylaı kómek kórsetiletin bolady», - dep jazdy áleýmettik jelidegi paraqshasynda Petropavl ákimi Serik Muhamedıev.