Petropavlda órtten 11 adam qutqarylyp, bireýi kóz jumdy
PETROPAVL. QazAqparat – Petropavlda eki qabatty turǵyn úıde órt boldy, dep habarlaıdy QazAqparat tilshisi.
Tótenshe jaǵdaılar departamentiniń habarlaýynsha, ekinshi qabattaǵy páter janyp ketken. Órt sóndirýshiler kelgen kezde qatty tútin baıqalǵan, ashyq jalynda úıdiń qabyrǵalary men tóbesi janyp jatqan.
Órt bolǵan jerden 48 jastaǵy er adam qutqaryldy. Betin 1-2 dárejeli kúıik shalǵan ony qalalyq aýrýhananyń jansaqtaý bólimine jetkizgen. Eki qoly, denesi jáne joǵarǵy tynys alý joldaryn kúıik shalǵan. Denesiniń 25%-y janǵan. 71 jastaǵy úı qojaıyny órtten kóz jumdy. Onyń denesin órt sóndirýshiler taýyp aldy.
Úıden 11 adam, onyń ishinde bir bala qaýipsiz jerge kóshirildi. Órt sóndirýshiler 3 gaz ballonyn shyǵardy.
Páterdegi órttiń aldyn ala sebebi – elektr jelileriniń qysqa tuıyqtalýy.
Jyl basynan beri aımaqta 39 adam órtten qaıtys bolsa, 28 adam jaraqat alǵan. 42 soltústik qazaqstandyqty qutqaryp alǵan.
