Petropavlda órt sóndirýshiler baspanaly boldy

PETROPAVL. KAZINFORM – Petropavlda órt sóndirý qyzmetiniń úsh mamanyna jańa páterlerdiń kiltteri tabystaldy.

Soltústik Qazaqstan oblysy tótenshe jaǵdaılar departamenti baspasóz qyzmetiniń málimetinshe, óńirdiń órt sóndirýshileri alǵash jańadan salynǵan kópqabatty úıden baspanaly bolyp otyr. 

- Páterler 19-shy shaǵyn aýdanda ornalasqan. Jaqsy jaǵdaı jasalǵan eki bólmeli páterler. Bul bizdiń qyzmet úshin asa mańyzdy oqıǵa. Shuǵyl áreket etetin mamandardyń turmys jaǵdaıyn jaqsartý boıynsha memlekettik saıasattyń iske asyp jatqandyǵynyń kórinisi, - dedi páter kiltterin saltanatty jaǵdaıda tabys etken departament bastyǵy Jomart Asqarov. 

Órt sóndirýshilerge berilgen páterler – qyzmettik úı bolyp esepteledi. Baspanaly bolǵandardyń ishinde kópbalaly otbasylar da bar. 

- Órt sóndirýshiler men qutqarýshylarǵa yńǵaıly turmystyq jaǵdaı jasaý vedomstvonyń alǵa qoıǵan basymdyqtarynyń biri. Bul basyn únemi qaýip-qaterge tigetin qyzmetkerlerdiń kásibı rýhyn kóterýge kómektesedi, - deıdi Jomart Asqarov. 

Buǵan deıin SQO-da kásipkerlerdi bopsalap kelgen eki blogerge sot úkimi shyqqanyn jazǵan edik.