Petropavlda órt sóndirýshiler bir otbasyny aman alyp qaldy
PETROPAVL. QazAqparat - Petropavlda órt sóndirýshiler bir otbasyny órtten qutqardy, dep habarlaıdy QazAqparat tilshisi.
SQO TJD baspasóz qyzmetiniń habarlaýynsha, sáýirdiń 24-i kúni Petropavlda bes qabatty úıde órt shyqqan. Shaqyrtý boıynsha jetken órt sóndirýshiler sońǵy qabattaǵy balkondardyń birinen kómek suraǵan er adamdy, áıeldi jáne kishkentaı balany kóredi. Avtobaspaldaqty shyǵarýǵa aýla tar jáne kólikter turǵandyqtan qutqarýshylar páterge kóterilip, otbasyny arnaıy kıimmen alyp shyqqan.
«Biz páterge kelgende esik ashyq eken, al esiktiń jıekterine tútin kirmeýi úshin sýly shúberek tastapty. Úıden Vıktor men Natalıany ertip jáne olardyń 6 jasar uly Kolıany kóterip alyp shyqtyq. Qobaljydy árıne, biraq ózderin jaqsy ustady», - deıdi qutqarýshy Aslan Esenǵalıev.
Mamandardyń aıtýynsha, órt 5 qabatty úıdiń úshinshi qabatyndaǵy elektrqalqannan shyqqan. Ol joǵary órlep, 4-shi qabattaǵy elektrqalqanǵa da zaqym keldi.
«Órt sóndirýshilerdi der kezinde shaqyrǵan. Sál keshikkende jalyn páterlerdi sharpıtyn edi. Polıtseıler de tez arada jetip, qaýipti aımaqty qorshady. Turǵyndardy qaýipsiz jerge shyǵarýǵa kómektesti», - deıdi mamandar.
TJD mamandary kópqabatty úıden 25 adamdy evakýatsııalady, onyń ishinde 3 bala bar. Taǵy bir aıta ketetin jaıt - turǵyndar esik aldyna óz betimen shlagbaým qoıǵan. Bul qutqarýshylardyń jumysyna kedergi jasady. Ony qoparyp alyp tastaǵannan keıin ǵana oqıǵa ornyna jetý múmkin boldy.
