Petropavlda órt sóndirý-qutqarý sportynan respýblıkalyq týrnır ótip jatyr
PETROPAVL. QazAqparat - Petropavlda órt sóndirý-qutqarý sportynan «Órt sóndirýshiler men qutqarýshylardyń sport federatsııasy» qoǵamdyq birlestiginiń kýbogy úshin respýblıkalyq týrnır ótip jatyr, dep habarlaıdy QazAqparat tilshisi.
Respýblıkalyq jarysqa Astana, Almaty qalalarynan jáne el óńirlerinen 13 komanda, 190 sportshy qatysýda. Erler jáne áıelder qurama komandalarynyń árqaısysynda 8 músheden bar. Buǵan deıin osyndaı týrnır Shymkent jáne Almaty qalalarynda ótse, bıyl Qyzyljar óńiri qarsy aldy. Jarystyń ashylý saltanatynda oblys ákiminiń orynbasary Anton Fedıaev qatysýshylardy quttyqtap, sáttilik tiledi.
«Mundaı is-sharalardyń mańyzy zor. Elimizde salamatty ómir saltyn qalyptastyrýǵa, dene shynyqtyrý-sport salalaryn damytýǵa erekshe mán beriledi. Bul jarys órt sóndirý-qutqarý sportyn nasıhattap qana qoımaı, qyzmetkerlerdiń densaýlyǵyn, biliktiligin de arttyrýǵa septesedi», - dedi Anton Fedıaev.
Alǵash bolyp jarys alańyna erler komandasy shyǵyp, kedergilerge toly 100 metr joldy baǵyndyrdy. Birer saǵatqa sozylǵan tartysty báseke barysynda myqtylardyń esimi anyqtaldy. SQO Tótenshe jaǵdaılar departamenti baspasóz qyzmetiniń habarlaýynsha, jalpykomandalyq esepte shyǵysqazaqstandyq komanda - birinshi, atyraýlyq komanda - ekinshi oryndy jeńip aldy. Al Mańǵystaý oblysynyń sportshylary úshtik qatarynan kórindi.
Birinshi kúnniń qorytyndysy boıynsha jekeleı synda birinshi jáne ekinshi oryndy atyraýlyqtar - Nıkolaı Býtorın men Danııl Pýzıkov alsa, úshinshi oryn BQO kelgen Dmıtrıı Agafonovqa buıyrdy. Týrnır eki kúnge shaqtalǵan.
