Petropavlda órt shyqqan úıden 11 bala evakýatsııalandy
PETROPAVL. QazAqparat – Búgin Petropavlda bes qabatty úıden órt shyǵyp, 36 adam, sonyń ishinde 11 bala qaýipsiz jerge shyǵaryldy, dep habarlaıdy QazAqparat tilshisi.
Soltústik Qazaqstan oblystyq Tótenshe jaǵdaılar departamenti baspasóz qyzmetiniń málimetinshe, K.Sútishev kóshesi, 51-úıden órt shyqqandyǵy jóninde habar saǵat 11.30 shamasynda túsken. Oqıǵa ornyna jetken qutqarýshylar bes qabatty úıdiń úshinshi qabatyndaǵy páterdiń balkony janyp jatqanyn kórip, birden iske kirisken. Tútinge oranǵan podezden 36 turǵyndy, sonyń ishinde 11 balany qaýipsiz jerge shyǵardy.
Saǵat 12.00 shamasynda jalyn tolyǵymen sóndirildi. Órt sóndirýshilerdiń jedel qımyly arqasynda basqa páterlerge zaqym kelgen joq. Alaıda, ot tutanǵan baspananyń jáne onyń balkonynyń terezesi janyp ketti. Sondaı-aq úı múlkine zaqym keldi. Qazir órttiń shyǵý sebebi jáne kelgen shyǵyn mólsheri anyqtalyp jatyr.
Mamandardyń aıtýynsha, jyl basynan oblysta 181 órt tirkelip, 16 adam, sonyń ishinde eki bala qaza tapty.
Aıta keteıik, keshe Pavlodar oblysynda úıiniń balkonynda káýap pisirgen turǵyn jaýapqa tartylǵan bolatyn.
