Petropavlda opyrylǵan murjanyń ornyna salynǵan jańasy bıyl iske qosylmaıdy
PETROPAVL. KAZINFORM — Petropavldaǵy № 2 jylý-elektr ortalyǵynda jylytý maýsymy qarsańynda jıyn ótip, strategııalyq nysannyń qysqa ázirligi tekserildi. Bıyl munda jańǵyrtý jumystary júrgizildi.
Soltústik Qazaqstan oblysynyń ákimi Ǵaýez Nurmuhambetov qatysqan jıynda jylý elektr ortalyǵynyń turaqty jumysyn qamtamasyz etý máseleleri talqylanyp, jabdyqtardyń jaǵdaıy men aldaǵy qysqa daıyndyǵy pysyqtaldy. Jańǵyrtý jáne jóndeý josparynyń oryndalýyna erekshe nazar aýdaryldy.
Bıyl jylý ortalyǵynda № 9 qazandyq pen № 3 týrboagregat kúrdeli jóndelip, iske qosyldy. Sondaı-aq mundaǵy jabdyqtarǵa aǵymdaǵy jóndeý jasaldy.
Qazir № 1 qazandyq pen № 6 týrboagregat kúrdeli jóndelip jatyr. Mamandardyń aıtýynsha, jylytý maýsymyn bastaý úshin 5 qazandyq pen 5 týrbogenerator qajet, olar jumys istep tur.
Jylý ortalyǵynyń jańa murjasy da boı kóterip keledi. Ol tek kelesi jyly iske qosylady. Bıyl da Petropavl qysty istep turǵan eki murjamen ótkizbek. Ol qalany jylýmen qamtamasyz etýge jetkilikti.
«Stantsııada kómir qory da jetkilikti. Kómir tuıyqtarda da bar, sondyqtan turǵyndardy qatty otynmen erterek qamdanýǵa shaqyramyn», — dedi óńir basshysy jıynda.
Budan bólek «Petropavl jylý jelileri» JShS № 3 jylý magıstralin jańǵyrtýdy aıaqtady. № 6 jylý magıstralinde jóndeý jumystary bastaldy. Barlyǵy 5 shaqyrymǵa jýyq jylý jelileri aýystyryldy.
«SK REK» JShS 246 km áýe elektr jelilerinde jumys júrgizdi. Sý tasqyny kezinde buzylǵan jańa elektr baǵandaryn ornatý aıaqtalyp jatyr.
Jalpy bıyl SQO boıynsha 1 myń shaqyrymnan astam elektr jelisi, 8 shaqyrym jylý jelisi, 7,4 shaqyrym sý qubyry aýystyryldy. Oblys ortalyǵynyń soltústik bóligin turaqty jylýmen qamtamasyz etetin jylý magıstrali salynyp jatyr.
Buǵan deıin 10 qyrkúıekte Kókshetaý JEO qurylysy bastalatynyn jazǵan edik.
