Petropavlda ońtústik-shyǵys sý qubyry osymen úshinshi márte jaryldy
«Qyzyljar Sý» JShS-niń atqarýshy dırektory Arman Saýytovtyń aıtýynsha, 16 aqpan kúni saǵat 14.00-de Petropavldaǵy Ýnıversalnyı kóshesiniń boıynda D=800 mm sý qubyrynyń jarylǵany týraly habar túsken.
«Tekserý kezinde «Dıqanshy» fırmasynyń mańyndaǵy temirjoldyń qasynda sýdyń aǵyp jatqanyn kórdik. Sondyqtan barlyq kúshti osy apat ornyna jumyldyryp, dalaǵa aqqan sýdy 40 mınýttyń ishinde toqtattyq. Keıin sýsyz qalǵan Jumysshy kenti men Bereke, Vokzal mańy shaǵyn aýdandaryna sý berý máselesin sheshýge kiristik. Túni boıy jumys istep, tek búgin tańǵy 5.00 shamasynda sý berdik. Saǵat 10.00 kezinde sý Petropavldaǵy barlyq páterde boldy. Qazirgi ýaqytta turǵyndardan shaǵym túsip jatqan joq. Sý qysymy qalypqa keldi», - deıdi Arman Saýytov.
Qazirgi ýaqytta kásiporyn jumysshylary apat ornynda júr. Ázirge aqaý orny tabylǵan joq.
«Jańa qubyr 2009 jyly salynǵan bolatyn. Bir ereksheligi – eski qubyrdyń ishinen jańa qubyr tartylǵan. Sondyqtan bul - jumysty qıyndatyp jatyr.
Ázirge osy – ońtústik-shyǵys sý qubyryn jazǵa deıin qospaımyz dep sheshtik. Óıtkeni bul ońtústik-shyǵys sý qubyrynda osymen úshinshi ret apattyq jaǵdaı oryn alyp otyr. Ázirge qubyrdyń neden jarylǵanyn aıtý qıyn. Bizdiń oıymyzsha, tabıǵı jaǵdaı sebep bolýy múmkin. Óıtkeni qar kesh tústi, jer qabaty qatyp qaldy. Ári qubyrdyń ishinen qubyr jiberilýi de durys bolmady. Qubyr oınamaly, oǵan temirjoldyń qasynda jatýy da sebep. Ári plastık qubyrlar jańa paıda bola bastaǵan kez, múmkin sapasyz materıal qoldanylǵan bolar», - deıdi kásiporynnyń atqarýshy dırektory.
Mamannyń aıtýynsha, bul sý qubyry 1980 jyldardyń basynda temirjolshylardyń ótinishimen poıyzdarǵa sý quıý úshin salynǵan eken.
Tozyǵy jetkennen keıin jańǵyrtylǵan. Uzyndyǵy - shamamen 3 km.
Jalpy qazirgi ýaqytta Petropavlda sý qubyrlarynyń 57 % tozyǵy jetken.
Kadrdan alynǵan vıdeo instagram.com/zhkh.petropavlovsk
