Petropavlda óndiristik tsehte shyqqan órt robottyń kómegimen sóndirildi
ASTANA. KAZINFORM — Petropavl qalasynda kúnbaǵys maıyn óndiretin óndiristik nysanda órt shyǵyp, qyzyl jalyn 150 sharshy metr aýmaqty sharpydy, dep habarlaıdy TJM baspasóz qyzmeti.
Jumys barysynda órt sóndirý roboty qoldanylyp, bul jumystyń tıimdiligin arttyrýǵa jáne jeke quram úshin táýekelderdi azaıtýǵa múmkindik berdi.
— Jalyn tseh ishinde tutanyp, ǵımarattyń shatyryna taralyp, odan ári jaıylý qaýpin týdyrdy. Oqıǵa ornyna TJD bólimsheleri jedel túrde jetip, 150 sharshy metr aýmaqty sharpyǵan órtti sóndirdi. Qabyldanǵan sharalardyń nátıjesinde jalpy aýmaǵy shamamen 2000 sharshy metrdi quraıtyn ǵımaratqa órttiń taralýyna jol berilmedi. Zardap shekkender joq. Órttiń shyǵý sebepteri anyqtalyp jatyr, — delingen habarlamada.
Budan buryn Shymkentte gaz qubyrynan órt shyqqany belgili boldy.