Petropavlda ońaltý ortalyǵynan ótkenderdiń teń jartysy ortopedııalyq em alǵan
PETROPAVL. KAZINFORM – Petropavlda on aıdyń ishinde 700-den astam turǵyn ońaltý ortalyǵynda tegin em aldy. Mundaı múmkindik áleýmettik medıtsınalyq saqtandyrý qorynda «saqtandyrylǵan» mártebesine ıe azamattarǵa berilgen.
Ońaltý ortalyǵy Petropavldaǵy kópbeıindi qalalyq aýrýhanada ornalasqan.
«Áleýmettik medıtsınalyq saqtandyrý qory» KEAQ SQO fılıaly baspasóz qyzmetiniń málimetinshe, 716 óńir turǵyny ońaltý ortalyǵynda emdelýi úshin 163 mln 400 myń teńge shamasynda qarjy jumsalǵan. Ortalyqta júıke júıesi zaqymdanǵan, neırohırýrgııalyq, ortopedııalyq ota jasalǵan jáne travmatologolııalyq zaqym alǵan naýqastar emdeledi.
Petropavl turǵyny Sáýle Mustafına tizesi búgilmeı qalyp, aýrýhanaǵa jatty. Dárigerler syrqatty teksere kele, dereý menıskige ota jasaýǵa sheshim qabyldaıdy.
«Jazda maǵan artroskopııa jasaldy. Bir aıdan soń ońaltý ortalyǵyna kelip, em-dom qabyldadym. Tizemdi búge almaǵandyqtan ońaltý protsedýralary qajet-aq edi. Qazir 2-shi ret ortalyqta em qabyldap jatyrmyn. Otadan keıin jarty jyldyń ishinde 3 ret emdeý mekemesinde jatý kerek eken», - deıdi Sáýle Mustafına.
Saýyqtyrý 14 kúnge shaqtalǵan. Osy aralyqta emdelýshiler jylytý, elektr toǵy, ýltradybystyq qondyrǵylarmen emdelip, medıtsınalyq massaj alady, dene bulshyqetterin shıratatyn arnaıy trenajerlerde jattyǵýlardy jasaıdy.
Dárigerlerdiń aıtýynsha, sońǵy ýaqytta aıaq-qol býyndarynyń syrqyraýyna baılanysty turǵyndar shaǵym kóp.
«Bizdiń kópbeıindi qalalyq aýrýhananyń ońaltý ortalyǵy 45 jatyn orynǵa shaqtalǵan. Naýqastar dárigeri arqyly portalǵa ótinish qaldyryp, kezekke turady. Keıin olar ońaltý protsedýralarynan ótedi. Emdelýshilerdiń em-domy MÁMS júıesi arqyly qarjylandyrylǵan», - deıdi fızıoterapııa bólimshesiniń meńgerýshisi Anjelıka Osııan.
Jyl basynan beri ońaltý ortalyǵynda em alǵandardyń 344-i ortopedııaǵa qatysty bolsa, 257-si jaraqat alǵandar, 111-i nevrologııalyq derti barlar jáne 4-ne neırohırýrgııalyq ota jasalǵan.
Buǵan deıin SQO-da 150-ge jýyq dárigerdiń orny bos turǵanyn jazǵan edik.
