Petropavlda oqýshylar 1 tonnadan astam qaǵaz ben plastık qaldyǵyn jınady
Green help qoǵamdyq birlestiginiń málimetinshe, «Eco batyr» baıqaýy Petropavldaǵy Qojabergen jyraý atyndaǵy №6 orta mektep negizinde ótti. «Oǵan bastapqyda qala mektepterinen 17 bala qatysýǵa tilek bildirse, tek 11-i ǵana qaǵaz ben plastık qaldyǵyn jınaýda belsendilik tanytty.
Eso life jobasy baıqaýdy USAID Ortalyq Azııanyń azamattyq qoǵamyna qoldaý bildirý baǵdarlamasynyń granty negizinde uıymdastyrdy. 10 naýryzda bastaý alǵan jarys eki aıǵa sozyldy. Osy aralyqta qatysýshy balalar qaıtalama shıkizat jınap tapsyrýdan jarysty», - deıdi eko-volonter Azat Jumaǵul.
Mektep oqýshylary makýlatýra - gazet qıyndysy, kitap, jýrnal, karton jáne túrli qaǵaz, plastık bótelke men qaqpaǵyn jınaýdan jarysty.
«Radýga», «SQO-Vtorresýrs» JShS-lary baıqaýǵa demeýshilik jasady jáne balalardyń jınaǵan qaldyqtaryn qabyldap aldy. Jalpy baıqaýdyń maqsaty – qaldyqty bólip jınaýǵa nazar aýdartý. Balalardyń boıynda ekologııalyq mádenıetti qalyptastyryp, tabıǵı resýrstardy saqtaýǵa tárbıeleý», - Azat Jumaǵul.
Nátıjesinde 280 kg qaldyq jınaǵan 5-synyp oqýshysy Qamajaı Beısenbaı jeńimpaz atanyp, 30 myń teńge syıaqy aldy. Ekinshi jáne úshinshi oryndy alǵandarǵa da 20, 10 myń teńge syıaqy berilse, qalǵan qatysýshylar maqtaý qaǵazymen marapattalyp, tátti syılyqtar aldy.
Jalpy baıqaý barysynda balalar 1 tonna 130 keli qaǵaz ben plastık qaldyǵyn jınady.
Sondaı-aq baıqaýǵa qatysýshy balalar «Radýga» JShS-na baryp, ózderi jınaǵan qaldyqty kádegi jaratý protsesine kýá boldy.