Petropavlda oqýshy jaraqattaǵan balalarǵa alǵashqy kómek kórsetken feldsher jazalanýy múmkin
Soltústik Qazaqstan oblysy densaýlyq saqtaý basqarmasy baspasóz qyzmetiniń málimetinshe, 13 aqpan kúni saǵat 7:55-te «103» pýltine N.Nazarbaev kóshesindegi №4 mektepten shaqyrtý túsken. Telefon shalǵan adam balalardyń basynan jaraqat alǵanyn habarlaǵan. Jedel járdem brıgadasy 4 mınýtta jetip, zardap shekkenderge medıtsınalyq kómek kórsetti. Kómek sapaly kórsetilgen.
Biraq jedel medıtsınalyq kómek brıgadasynyń aǵa feldsheri oqıǵa ornyna jetisimen erejege saı shara qoldanbaǵan.
«Erejege saı zardap shekkender sany 3 ne odan da kóp bolsa, birinshi bolyp jetken jedel-medıtsınalyq kómek brıgadasy aldymen suryptaýdan ótkizip, odan keıin aýysymnyń kezekshi dárigerine jaraqat alǵandardyń sany týraly aqparat berýi kerek. Aǵa feldsher munyń birin istemegen, qosymsha jedel járdem qyzmetin shaqyrmaǵan. Zardap shekken balalar oblystyq balalar aýrýhanasyna jetkizildi. Osy aralyqta dıspetcherlik qyzmetpen baılanys bolmaǵan. Jaraqat alǵan balalardyń sany jóninde shaqyrtý aıaqtalǵannan keıin ǵana belgili boldy.
Zardap shekkender óte aýyr jaraqat alǵan jaǵdaıda feldsherdiń belgili standarttardy qoldanbaýy olardyń halin qıyndata túser edi», - delingen baspasóz habarlamasynda.
Ázirge zardap shekkenderge alǵashqy medıtsınalyq kómek kórsetken feldsherge tártiptik shara qoldanylǵan joq. Bul oqıǵa emdeý-baqylaý komıssııasynyń otyrysynda talqyǵa túsip, qorytyndy jasalyp, sheshim qabyldanbaq.
Esterińizge salaıyq, Petropavldaǵy №4 mekteptiń 9-synyp oqýshysy sabaqqa balta-pyshaqpen qarýlanyp kelip, úsh balany jaraqattaǵan edi.
Balalardyń birine emdeý mekemesinde kómek kórsetilip, keıin ambýlatorlyq em alýǵa úıine jiberildi. Aýyr jaraqat alǵan eki balaǵa shuǵyl túrde ota jasalyp, jansaqtaý bólimine jatqyzyldy.
Al, 9-synyp oqýshysy 2 aıǵa qamaýǵa alyndy.
