Petropavlda ógeı ákesi men sheshesi urǵan 7 jasar qyz aýrýhanaǵa tústi
Petropavlda ógeı ákesi men týǵan anasy uryp-soqqan 2-synyp oqýshysy aýrýhanaǵa tústi. Bul isti polıtseıler «Densaýlyqqa qasaqana aýyrlyǵy ortasha zııan keltirý» babymen tergep jatyr, dep habarlaıdy Kazinform.
Soltústik Qazaqstan oblysy Polıtsııa departamenti baspasóz qyzmetiniń málimetinshe, 23 qarasha saǵat 17.00 shamasynda Petropavl qalasy polıtsııa basqarmasynyń birinshi polıtsııa bólimine oblys ortalyǵyndaǵy orta mektepterdiń biriniń medıtsına qyzmetkeri telefon soǵyp, 7 jasar 2-synyp oqýshysyn uryp-soǵý faktisin anyqtaǵanyn habarlaǵan.
Atalǵan fakti Qylmystyq kodekstiń 107-babynyń 1-bóligi «Densaýlyqqa qasaqana aýyrlyǵy ortasha zııan keltirý» boıynsha Petropavl qalasy polıtsııa basqarmasynda Sotqa deıingi tergep-tekserýlerdiń biryńǵaı tizilimine tirkeldi.
Qazirgi ýaqytta qyz bala oblystyq balalar aýrýhanasynda em alyp jatyr.
Tekserý barysynda kámeletke tolmaǵan balany 26 jastaǵy anasy men 33 jastaǵy ógeı ákesi uryp, zaqym keltirgendigi anyqtaldy. Olar óz kinásin moıyndap, mundaı jaǵdaıǵa balanyń tártipsizdigi sebep bolǵanyn aıtqan.
Іstiń barlyq mán-jaıyn zerdeleýge baǵyttalǵan sotqa deıingi tergeý júrip jatyr. Onyń nátıjesi boıynsha túpkilikti protsestik sheshim qabyldanbaq.