Petropavlda oftalmologııalyq dıagnostıkalyq ortalyq ashyldy
PETROPAVL. QazAqparat - Petropavlda oftalmologııalyq dıagnostıkalyq ortalyq ashyldy. Bul jerde soltústikqazaqstandyqtar táýliktiń kez-kelgen ýaqytynda tekseristen ótip, kúrdeli kóz aýrýlary bar syrqattar em qabyldaıtyn bolady, dep habarlaıdy QazAqparat tilshisi.
Endi óńir turǵyndaryna kózderine ota jasatý úshin basqa qalaǵa nemese shetelderge sabylýdyń qajeti joq. Táýlik boıy jumys isteıtin oftalmologııalyq ortalyq memlekettik-jekeshelik áriptestik aıasynda boı kóterdi. Jobany júzege asyrýǵa quıylǵan ınvestıtsııa kólemi - 550,4 mln teńge. Eki qabatty ǵımarattyń jalpy aýmaǵy 2 myń sharshy metr. Ortalyq Japonııada shyǵarylǵan zamanaýı úlgidegi emdeý-dıagnostıkalyq quraldarmen jabdyqtalǵan. Petropavlda buryn-sońdy jasalmaǵan kúrdeli ota túrleri endi osy jerde tegin isteledi.
«Halyqtyń ál-aýqaty men ómir súrý sapasyn arttyrý - Memleket basshysy qoıǵan basty tapsyrmalardyń biri. Bizdiń maqsatymyz - azamattarymyzǵa ózimizde sapaly medıtsınalyq qyzmet kórsetý. Buryn kórshi oblystarda, shet memleketterde jasalyp kelgen kóptegen otalardy endi ózimizde jasaı alamyz. Ortalyqta kóz aýrýlaryna erte dıagnostıka jasalyp, tıimdi emdelý úshin barynsha qolaıly jaǵdaılar jasalǵan. Kóptegen ota medıtsınalyq kómektiń kepildendirilgen kólemi aıasynda tegin jasalatyn bolady. Jalpy, emdeý mekemelerin qajetti qondyrǵylarmen jaraqtandyrýǵa bıyl biz byltyrǵydan 3 ese kóp - 4 mlrd teńge jumsaýdy josparlap otyrmyz», -deıdi oftalmologııalyq ortalyqtyń ashylý saltanatyna qatysqan SQO ákimi Qumar Aqsaqalov.
Ortalyqta ota, lazerlyq ota jáne dıagnostıka jasalady, sonymen qatar kúndizgi statsıonar men jádel járdem qyzmeti de qarastyrylǵan. 35 jatyn orynǵa shaqtalǵan klınıka jylyna 4,9 myń adamdy qabyldaýǵa qaýqarly. Emdeý mekemesi ashylýyna baılanysty otyzǵa jýyq jańa jumys orny paıda boldy.
«Birinshi qabatta ambýlatorııalyq qabyldaýǵa kelgenderge qyzmet kórsetemiz. Munda barlyq jaǵdaı jasalǵan. Manıpýlıatsııalar, operatsııalar, dıagnostıka bólmesi, otadan keıingi jatyn bólmeleri bar. Maqsatymyz turǵyndarǵa sapaly em-dom kórsetý, sondaı-aq balalar oftalmologııasyn damytý. Bul - búgingi tańdaǵy eń ózekti máselelerdiń biri», - deıdi oftalmologııalyq ortalyqtyń meńgerýshisi Janna Lahtına.
Búgingi tańda oblysta 7 myń adam kóz aýrýlary boıynsha dıspanserlik esepte tur. Onyń 2,5 myńy balalar men jasóspirimder. Aıta ketetin jaıt, ortalyq 2031 jylǵa deıin birtindep tolyqtaı memlekettiń menshigine ótpek.
