Petropavlda oblystyq aýrýhanadan 250 naýqasty evakýatsııalaýǵa týra keldi

PETROPAVL. QazAqparat – Soltústik Qazaqstan oblystyq kópbeıindi aýrýhanasyna jarylǵysh zat qoıyldy degen habar jalǵan bolyp shyqty, dep habarlaıdy QazAqparat tilshisi.

SQO kópbeıindi aýrýhanasynyń málimetinshe, 15 sáýir kúni saǵat 13.25 mınýt ketkende emdeý mekemesiniń zerthanasyna bireý habarlasyp, aýrýhanaǵa jarylǵysh zat qoıylǵanyn aıtqan.

Qońyraýǵa jaýap bergen dáriger birden tıisti organdarǵa habar beredi.

Aýrýhana ákimshiligi mamandandyrylǵan qyzmettermen birge ǵımarattan naýqastardy, qyzmetkerlerdi, barlyǵy 250 adamdy qaýipsiz jerge shyǵardy.

Al aýyr syrqattardy jaqyn mańdaǵy hırýrgııa korpýsyna jáne emhananyń akt zalyna ornalastyrdy.

Olar qajetti em-dommen jáne sýmen qamtamasyz etildi.

Mamandar ǵımaratty tekserdi, jarylǵysh zat týraly habar jalǵan bolyp shyqty.

SQO Polıtsııa departamenti bul aqparatty rastady. Baspasóz qyzmetiniń málimetinshe, oqıǵa ornyna barlyq tıisti qyzmetter jumyldyryldy.

Jarylǵysh zatty izdeýge qyzmettik ıtter qoldanyldy. Operatsııa eki saǵatqa sozyldy.

Qazirgi ýaqytta tártip saqshylary bomba qoıylǵandyǵy týraly telefon soǵyp, jalǵan habar bergen adamdy izdestirip jatyr.