Petropavlda «Ónege» aımaqtyq forýmy ótti

«Ónege» jobasy elimizdiń 9 oblysynda maýsym aıynan beri qolǵa alynǵan. Joba aıasynda Petropavl qalasynda otbasylardy áleýmettik qoldaý ortalyǵy ashyldy. Munda ajyrasqysy keletin erli-zaıyptylar psıholog, neıropsıholog jáne reabılıtolog sekildi mamandardyń kómegine júgine alady.

Pılottyq jobanyń qolǵa alynýyna elimiz boıynsha ajyrasý kórsetkishiniń artýy sebep. Máselen SQO-da jyl basynan 2 609 obasy qurylǵan. Alaıda osy aralyqta 1,5 myńnan astamy ajyrasýǵa ótinish bergen. Bul týraly Petropavlda ótken «Ónege» aımaqtyq forýmynda aıtyldy. Kezdesýdiń maqsaty – qıyn jaǵdaıǵa tap bolǵan otbasylarǵa kómek berý, qoǵamdaǵy ózekti máselege nazar aýdartý, otbasy qundylyqtaryn nasıhattaý. Jalpy, 5 aıda atqarylǵan jumystardy qorytyndylaý.

«Ortalyqqa kómek surap keledi. Negizgi másele otbasyndaǵy er-zaıyptylardyń bireýiniń ishimdikke jaqyn bolýy. Saldarynan shańyraqtyń berekesi ketedi, úıdegi urys ta, janjal da osydan shyǵady. Arty ajyrasý. Al budan qatty zardap shegetinder – balalar. Bizdiń psıhologtar balalarmen de kóp jumys isteıdi», - deıdi óńirlik otbasyn qoldaý qyzmetiniń jetekshisi Tatıana Kovaleva.

Ortalyqqa kómek surap kelgen erli-zaıyptylarǵa mamandar aqyl-keńes beredi. Mamandardyń pikirinshe, otbasyn saqtap qalýǵa bolady, ol úshin qarapaıym erejelerdi este ustaý qajet. Jalpy aıyrylysatyndardyń basym bóligi úılengenderine bir jyl tolmaǵan jas otbasylar eken.

«Eki jas súıip qosylǵannan keıin bir-birin tyńdaı bilýi kerek. «Men» degen sózdi umytyp, ne nárseni bolsyn birlesip sheshýge tyrysý qajet. Sebebi, erli-zaıyptylar óz degenimen júretin bolsa, sońy jaqsylyqqa aparmaıdy. Eger, otbasynda qıyndyq týyndasa ony ekeýi birdeı kóterýi tıis. Mine, bizde ajyrasyp jatqan jas otbasylarda osy máseleler kezdesedi», - deıdi psıholog Irına ıAkımova.

Joba oblysta júzege asyryla bastaǵaly 800-den astam adamdy qamtyǵan. Ortalyq mamandary joǵary oqý oryndaryna, mektepter men kolledjderge shyǵyp, sheberlik sabaqtary, trenıngter men jeke kezdesýler ótkizdi.