Petropavlda NZM oqýshysy úshinshi qabattan qulap, aýyr jaraqat aldy

PETROPAVL. KAZINFORM – Petropavldaǵy Nazarbaev zııatkerlik mektebinde 18 jastaǵy jigit úshinshi qabattan qulady.

Bilim ordasynyń málimetinshe, oqıǵa 17 aqpan kúni bolǵan. Mektep oqýshysy medıtsınalyq mekemede em-dom qabyldap jatyr. Oqıǵanyń sebepteri anyqtalý ústinde. 

Soltústik Qazaqstan oblystyq polıtsııa departamenti baspasóz qyzmetiniń málimetinshe, qazirgi ýaqytta sotqa deıingi tergeý bastaldy. QR Qylmystyq kodekstiń 105-baby 1-bólimi (ózin-ózi óltirýge ıtermeleý) boıynsha qylmystyq is qozǵaldy. 

Jaraqat alǵan jigit qazir Petropavl qalalyq kópbeıindi jedel medıtsınalyq kómek aýrýhanasynda em alyp jatyr. 

- Tekserý júrgizilgennen keıin naýqas shuǵyl túrde jansaqtaý bólimine jatqyzyldy. Onda jaǵdaıyn turaqtandyrýǵa, asqynýlardyń aldyn alýǵa jáne ómirlik mańyzdy kórsetkishterin turaqty baqylaýǵa baǵyttalǵan emdik-dıagnostıkalyq sharalar kesheni júrgizildi. Aldyn ala oǵan «polıtravma» dıagnozy qoıyldy. Denesiniń II bel omyrtqasy III dárejeli jabyq kompressııalyq synǵan. Eki ókshe súıegi yǵysýsyz jabyq synǵan.

Qazirgi ýaqytta naýqastyń jaǵdaıy aýyr, biraq turaqty dep baǵalanyp otyr. Ol ári qaraı em qabyldaý jáne baqylaý úshin travmatologııa bólimine aýystyryldy, - dedi SQO densaýlyq saqtaý basqarmasynyń baspasóz hatshysy Gúlnar Qalıeva.

Buǵan deıin SQO-da ýly suıyqtyq ishken 16 jasar qyz tikushaqpen Petropavlǵa shuǵyl túrde jetkizilgenin jazǵan edik.