Petropavlda nurotandyqtar stýdentter jataqhanalarynyń jaǵdaıymen tanysty

PETROPAVL. QazAqparat – Petropavlda «Nur Otan» partııasy Soltústik Qazaqstan oblystyq fılıaly «Qutty meken» partııalyq jobasy aıasynda stýdent jastardyń áleýmettik turmystyq jaǵdaıyna monıtorıng júrgizdi, dep habarlaıdy QazAqparat tilshisi.

«Nur Otan» partııasy SQOF baspasóz qyzmetiniń málimetinshe, arnaıy monıtorıngtik toptyń ókilderi Kozybayev University-diń 2 jataqhanasyn aralady. Búginde munda 180-ge jýyq adam turyp jatyr. Olardyń barlyǵy – qashyqtan oqýǵa tehnıkalyq múmkindikteri joq basqa qalalardan kelgen stýdentter. QR Bilim jáne ǵylym mınıstrliginiń usynymdaryna sáıkes ár bólmede 2 adamnan aspaýy tıis.

«Monıtorıngtik top músheleri jataqhanalarda turý jaǵdaıymen tanysty, jatyn bólmelerdiń, oqý zaldarynyń, kir jýý oryndarynyń, as úılerdiń, sanıtarııalyq toraptardyń jaı-kúıin kórdi. Qazir jataqhanaǵa qabyldaý ýnıversıtettiń resmı saıty arqyly elektrondy túrde júzege asyrylady. Bul - bıýrokratııalyq kidirister men sybaılas jemqorlyq táýekelderin tolyǵymen joıady», - dep atap ótti «Nur Otan» partııasynyń «Bolashaq» fılıaly tóraǵasynyń birinshi orynbasary Aleksandr Zel.

Monıtorıng barysynda partııalyqtar stýdentterdiń karantınge baılanysty sanıtarııalyq-gıgıenalyq normalardy saqtaý jumystarymen tanysty. Jataqhananyń ár qabatynda sanıtaızerler ornatylǵan, syrqattanǵan jastarǵa arnalǵan oqshaýlaǵysh bar.

Internet baılanysynyń sapasy men ınfraqurylymnyń qoljetimdiligi de nazardan tys qalmady. Barlyq jataqhanalar ishki jáne syrtqy beınebaqylaýmen, órt sóndirgishtermen jabdyqtalǵan.

«Monıtorıng barysynda zańbuzýshylyqtar anyqtalǵan joq. Biz stýdenttermen sóılestik, olardan shaǵymdar túsken joq, sózderine qaraǵanda turýǵa qolaıly jaǵdaı jasalǵan», - deıdi Aleksandr Zel.

Aıta keteıik, ýnıversıtette call-ortalyq jumys isteıdi. Munda stýdentterdiń oqý-bilim berý qyzmetterine qatysty usynys-ótinishteri qabyldanady.