Petropavlda «Nurly jer» baǵdarlamasymen satylǵan baspanalar talapqa saı bolmaı shyqty
PETROPAVL. KAZINFORM – Sotqa kópqabatty turǵyn úı turǵyndary men múlik ıeleriniń birlestigi talap aryz túsirgen.
Azamattyq isti Petropavldyń №2 soty qarady.
Soltústik Qazaqstan oblystyq sotynyń málimetinshe, talapkerler qalalyq ákimdiktiń qurylys, sáýlet jáne qala qurylysy bólimi men turǵyn úı-kommýnaldyq sharýashylyǵy, jolaýshylar kóligi jáne avtomobıl joldary bóliminen turǵyn úıdegi qurylys aqaýlaryn joıyp, turǵyn úıdi barlyq qajetti tehnıkalyq qujattarymen birge resmı túrde tapsyrýdy surady.
Sot barysynda kópqabatty turǵyn úı qalalyq ákimdiktiń qurylys, sáýlet jáne qala qurylysy bóliminiń tapsyrysymen salynǵany anyqtaldy. Vedomstvo merdiger uıymdardan nysandy qurylys kemshilikteri bola tura qabyldap alǵan. Keıin bul úı turǵyn úı-kommýnaldyq sharýashylyǵy bólimine berilip, páterler azamattarǵa «Nurly jer» memlekettik turǵyn úı qurylysy baǵdarlamasy aıasynda satylǵan.
Talapkerlerdiń ótinishi boıynsha sot qurylys-tehnıkalyq saraptama taǵaıyndady. Saraptama qorytyndysy turǵyn úıde kóptegen qurylys kemshilikteriniń bar ekenin rastady. Atap aıtqanda, shatyr jabynynyń, ortaq paıdalanylatyn oryndardyń árleý jumystarynyń, balkon qorshaýlarynyń, panelaralyq jikterdiń, pandýstyń, úıdiń aınalasyndaǵy sý ótkizbeıtin jolaqtyń, tireý qabyrǵasynyń, káriz júıesiniń, sondaı-aq irgeles aýmaqty abattandyrýdyń talapqa saı jasalmaǵanyn anyqtady.
Sot qurylysqa tapsyrys berýshi tarapynan merdiger uıymdardy mindettemelerdi tıisinshe oryndamaǵany úshin jaýapkershilikke tartý maqsatynda sharalar qabyldanǵanyn da anyqtady. Merdigerlerdiń birine sotqa deıingi talap qoıý jiberilse, ekinshisine qatysty memlekettik satyp alýdyń josyqsyz qatysýshysy dep taný týraly sot daýy bastalǵan.
Іs boıynsha usynylǵan dálelderdi zerttegen sot turǵyn úı ıeleriniń quqyqtary buzylǵan degen qorytyndyǵa kelip, talap aryzdy tolyq qanaǵattandyrdy. Sot sheshimimen jaýapkerlerge turǵyn úıdegi qurylys kemshilikterin joıý, oryndalǵan jumystardy qabyldaý-tapsyrý aktisi arqyly ótkizý jáne turǵyn úıdi qajetti tehnıkalyq qujattarmen birge tapsyrý mindeti júkteldi.
Sonymen qatar sot talap aryz qanaǵattandyrylǵandyqtan, júrgizilgen sot saraptamasy men ókil qyzmetine jumsalǵan shyǵyndardy qalalyq ákimdikten MIB paıdasyna óndirip berý týraly sheshim qabyldady.
Sot sheshimi zańdy kúshine engen joq.
Buǵan deıin Shymkentte sot sheshimimen 148 gektar jer memleket menshigine qaıtarylǵanyn jazǵan edik.
