Petropavlda Nur-Sultan qalasyndaǵy eń eski Imanov kóshesiniń maketi jasalyp jatyr
PETROPAVL. QazAqparat - Soltústik Qazaqstan oblysynda Nur-Sultan qalasynyń kúnine oraı 500-deı is-shara ótip, 20 shaqty áleýmettik nysan qoldanysqa berilmek, dep habarlaıdy QazAqparat tilshisi.
Astana kúnine josparlanǵan negizgi sharalar Petropavldaǵy bas jáne ortalyq alańnan bastaý alyp, Jeńis saıabaǵynda jalǵasyn tabady. Merekege oraı qala ǵana emes, aýdan ortalyqtary da bezendirilip, kontsertter, jastardyń fleshmoby, túrli baıqaýlar uıymdastyrylady.
Uıymdastyrýshylardyń aıtýynsha, Petropavl turǵyndary men qala qonaqtary Nur-Sultandaǵy eń eski kóshelerdiń biri - Imanov kóshesiniń kishireıtilgen nusqasyn kóre alady.
«Osy jyly qala ákimdigi men mádenıet basqarmasy bizge úlken jaýapkershilik artty. Biz qazir merekege qyzý ázirlik júrgizip jatyrmyz. Nur-Sultandaǵy Imanov kóshesiniń úlgisin jasap jatyrmyz. Bul kósheniń tarıhyn tolyqtaı zerttep, ornalasqan ǵımarattardy sýretke túsirdik. Kishireıtilgen 1 úıdiń uzyndyǵy 4 m, eni - 3, al jalpy aýdany 27 sharshy metr bolady. Ár úıdiń ara qashyqtyǵy 10 metrden. Sonymen qatar, Nur-Sultandaǵy trıýmfaldy arkanyń da pishinin jasap jatyrmyz», - deıdi «Gera» merekelik ındýstrııa jáne otbasylyq demalys ortalyǵynyń jetekshisi Alla Pısarenko.
Mereke oraı óńirde 20-ǵa jýyq áleýmettik nysan qoldanysqa beriledi dep josparlanǵan. Onyń ishinde eki kóp páterli turǵyn úı, qonaq úı, dámhana, sport alańdary, kovorkıng ortalyqtar, kirpish, túıirshiktelgen jemazyq óndiretin tsehtar, qoǵamdyq monsha men hımııalyq tazalaý ortalyqtary bar.
Oblys ortalyǵynda shildeniń 6-sy kúni «Qazaqstannyń úzdik taýary» kórme-baıqaýynyń óńirlik kezeńi, «Meniń Otanym - Qazaqstan» respýblıkalyq ekspedıtsııasy jáne oblystyń jas sýretshileriniń baıqaýy ótpek. Ortalyq alańda sonymen qatar, kúsh ıesi Sergeı Tsyrýlnıkovtyń shoýy jáne «Arızona» shoý baletiniń jańa kontserttik baǵdarlamalary jurt nazaryna usynylady. Mereke qazaq estradasynyń juldyzdary qatysqan kontsertpen aıaqtalmaq.
