Petropavlda noýtbýk pen planshettiń 7 túrli modeli shyǵarylady

NUR-SULTAN. QazAqparat - Elimizdegi tarıhy tereń, eń kóne zaýyttardyń biri - Petropavl qalasyndaǵy S.M. Kırov atyndaǵy zaýyt ZIKComputers markasymen kompıýterlik tehnıka shyǵara bastady, dep habarlaıdy QR IIDM baspasóz qyzmeti.

Tutynýshylarǵa otandyq Zik kompıýterleriniń 7 túri usynyldy. Olardy qazirdiń ózinde kaspi.kz jáne ForteMarket arqyly satyp alýǵa bolady. Jaqyn arada otandyq kompıýterlerdi «Qazposhtanyń» barlyq bólimshelerinen de alýǵa bolatyn bolady.

Zaýyttyń ınjenerlik áleýeti zor jáne mamandarynyń deńgeıi joǵary. Ónim sapasyna erekshe nazar aýdarylady. Memlekettiń qoldaýymen 2018-2020 jyldar ishinde kásiporynda jańǵyrtý júrgizildi. Dáldik synyby bes, kópqabatty baspa platalaryn óndirýge jáne SMD-montajdaýǵa arnalǵan jabdyq alyndy. Bul zaýytqa elektrondy ónerkásipti, sonyń ishinde ZIKComputers shyǵarýdy damytý úshin qýatty baza qurýǵa múmkindik berdi. Óndiristi qoldaý úshin 2 mlrd. teńgeden astam qarajat bólindi.
ZIKcomputers jelisiniń óndiristik qýaty - jylyna 100 000 birlik kompıýterlik tehnıka.
Kompıýterlik tehnıkany daıyndaýǵa arnalǵan komponentterdi seriktesteri - elektronıka, kompıýterlik tehnıka jáne serverlik jabdyqtar óndirisinde 30 jyldyq tájirıbesi bar Great Wall kompanııasy jetkizedi. ZIK brendimen shyǵarylǵan árbir ónim Windows 10 Pro lıtsenzııalyq operatsııalyq júıesimen jabdyqtalady jáne sheteldik analogtardan esh aıyrmashylyǵy joq. Al baǵasy arzandaý.
Keńes zamanynda zaýyt «Pobeda», «Rekord», «Qazaqstan» radıoqabyldaǵyshtaryn, «Esil» RPÝ jáne basqa da qyzyqty elektr aspaptaryn shyǵardy. Jáne ol ónimder joǵary suranysqa ıe boldy.