Petropavlda nóser jaýynnan keıin qutqarý qyzmetine 100-den astam qońyraý tústi
PETROPAVL. KAZINFORM – Petropavlda jaýyn-shashyn saldarynan 112 jelisine turǵyndar men uıymdar sý basý týraly 100-den astam qońyraý shalǵan.
Soltústik Qazaqstan oblysy tótenshe jaǵdaılar departamentiniń málimetinshe, Petropavlda qutqarýshylar sý sorǵyzý jumysyna kirisip ketken.
Vedomstvo bul jumysqa 18 motopompa jáne 36 qyzmetkerdi bólip, sý sorý jumystary kúsheıtilgen rejımde júrgizilip jatyr.
Petropavl qalalyq ákimdiginiń málimetinshe, oblys ortalyǵynda kóshe ýchaskelerin, aýlalardy jáne keı úılerdiń jertólelerin sý basty.
– Jaýynnyń saldaryn joıý úshin qazirgi ýaqytta apattyq qyzmetter iske kiristi. «Qyzyljar sý» JShS jáne qalalyq kárizdik tazartý qurylystarynyń kúshteri – 20 shaqty sorǵysy bar tehnıka, ekskavator, 30-dan astam motopompa jáne 80-nen astam adam jumyldyryldy. Turǵyndardyń barlyq ótinishi qabyldanyp, kezekpen sý sorǵyzý jumysy júrgizilip jatyr, - delingen resmı jaýapta.
Al áleýmettik jeli arqyly shaǵymdanýshylar qatary azaıar emes.
Buǵan deıin Petropavlda jańbyrdan keıin kóshe-úılerdi sý basyp, turǵyndardy áýre-sarsańǵa salǵanyn jazǵan edik.