Petropavlda «nesıe alýǵa kómektesemin» dep jurtty aldaǵan kúdikti ustaldy
PETROPAVL. QazAqparat - Petropavlda polıtsııa aqsha alyp «bank nesıesin resimdeýge kómektesemin» dep, jurtty aldap kelgen kúdiktini ustady, dep habarlaıdy QazAqparat tilshisi.
Soltúsitik Qazaqstan oblysy Polıtsııa departamenti baspasóz qyzmetiniń habarlaýynsha, Petropavl qalalyq Polıtsııa basqarmasyna alaıaqtyń quryǵyna túsken qala turǵyny júgingen. «Nesıe alýǵa kómektesemin» degen aılaker osy «qyzmeti» úshin 30 myń teńge suraǵan. Alaıda, aqshany alǵan soń habarsyz ketken.
Polıtsııa izdestirý kezinde buryn múliktik qylmys jasaǵany úshin sottalǵan 1985 jylǵy petropavldyqty ustaldy. Qazirgi ýaqytta onyń dál osyndaı 10 qylmysqa qatysy anyqtaldy. Ol turǵyndardan 20 myńnan 40 myń teńgege deıin aqsha alǵan.
Atalǵan fakti Sotqa deıingi tergep-tekserýdiń biryńǵaı tizilimine QR Qylmystyq kodeksiniń 190-baby «Alaıaqtyq» boıynsha engizildi.
«Kúdikti ýaqytsha ustaý ızolıatoryna qamaldy. Onyń basqa da epızodtarǵa qatysy anyqtalyp jatyr. Múliktik qylmystardyń tergelýi oblystyq polıtsııa basshylyǵynyń erekshe baqylaýynda», - dep habarlady Petropavl qalalyq PB bastyǵy Jandos Muqatov.
Tártip saqshylarynyń málimetinshe, jyl basynan Soltústik Qazaqstan oblysynda «Alaıaqtyq» baby boıynsha 176 qylmystyq is qozǵalǵan.
