Petropavlda nemereleri ájesiniń ósıetin sot arqyly jaramsyz dep tanydy

PETROPAVL. KAZINFORM — Petropavl qalasynyń № 2 sotynda ósıetti jaramsyz dep taný týraly azamattyq is qaraldy. Daý mırasqa qaltyrylǵan páterge qatysty týǵan.

Sottyń málimetinshe, talap aryzdy qaıtys bolǵan áıeldiń nemereleri bergen. Ósıet boıynsha, marqumnyń páteri onyń kútýshisine mırasqa qaldyrylǵan edi.

Sot otyrysy barysynda qaıtys bolǵannan keıingi sot-psıhologııalyq-psıhıatrııalyq saraptama taǵaıyndaldy. Sonymen qatar, nevropatolog, psıhıatr jáne kardıolog mamandarynyń qorytyndylary usynyldy. Saraptama nátıjeleri talap qoıýshylardyń dálelderin rastady: ósıet jasalǵan sátte áıel óz áreketteriniń mánin tolyq baǵalaı almaǵan.

Taraptar sot protsesi barysynda ózara tıimdi sheshimge kelip, medıatsııalyq kelisim jasasty. Kelisimniń sharttary taraptardyń eshqaısynyń quqyqtaryn buzǵan joq. Ósıettiń jaramsyz dep tanylýyna baılanysty muragerlik zań boıynsha júzege asyrylatyn boldy.

Sonymen qatar, kútýshiniń marqumǵa qaryzyn nemereleri keshirýge sheshim qabyldady. Olar qaryzdy kútýshiniń kórsetken eńbegi men qyzmetine ótem retinde qarastyratynyn málimdedi.

Sondaı-aq taraptar sot shyǵyndaryn da bir-birinen óndirýden bas tartty.

Buǵan deıin bloger Erbolat Janabylovtyń jubaıyna qatysty sot protsesi bastalǵanyn jazǵan edik.