Petropavlda Naýryzǵa jeti túrli kıiz úıler tigiledi

PETROPAVL. QazAqparat - Óńirlik kommýnıkatsııalar qyzmetinde ótken jıynda mádenıet basqarmasy basshysynyń mindetin atqarýshy Dosbol Ábdirisov Petropavl Naýryzdy qalaı toılaıtyny týraly aıtyp berdi, dep habarlaıdy QazAqparat tilshisi.

Negizgi sharalar 21 naýryz kúni oblys ákimdiginiń aldyndaǵy basty alańda ótedi. Onda teatr qoıylymdary, qazaqtyń ulttyq salt-dástúrleri, saýyq-saırandar, sport jarystary bolady.

«Bas alań Elbasynyń «Uly dalanyń jeti qyry» maqalasynda aıtylǵan pikirlerdi eskere otyryp bezendiriledi. Jeti túrli taqyrypqa arnalǵan kıiz úıler tigiledi. Olardyń birinde eneolıt dáýiriniń «At miný mádenıeti, Botaı kórmesi» atty arheologııalyq mádenıet kórsetiledi. Ekinshisi - «Uly dalanyń ejelgi metallýrgııasy», úshinshisi - «Ań stıli», tórtinshisi - «Altyn adam», besinshisi - «Túrki dúnıesiniń besigi» altynshysy - «Uly Jibek joly», jetinshisi - «Qazaqstan - alma men qyzǵaldaqtyń otany» dep atalady», - dedi D. Ábdirisov.

Onyń aıtýynsha, qolónershiler kórmesine Reseıdiń shekara mańyndaǵy óńirlerinen de sheberler keledi.

Aqyn Erik Asqarovtyń 60-jyldyǵyna arnalǵan respýblıkalyq aqyndar aıtysy bolady.

Avtor: Olesıa Jýkoven